Policia britanike mbetet e izoluar nga databaza e BE-së për kriminelët

Policët e vijës së parë dhe oficerët e forcave kufitare do të mbeten të izoluar nga qasja në databazën e BE-së për të dyshuarit për terrorizëm, kriminelët dhe shkelësit e imigracionit, për të paktën katër vjet të tjerë, ka pranuar në heshtje Ministria e Brendshme e Mbretërisë së Bashkuar.

Policia e Mbretërisë së Bashkuar dhe shërbimet e sigurisë kryen më shumë se 600 milionë kontrolle në kohë reale në Sistemin e Informacionit Shengen II [SIS II] në vitin 2019, por një vit më vonë e humbi qasjen në këtë sistem, për shkak të Brexitit, raportoi The Guardian të mërkurën.

Një nëpunës civil tha se ata shpresonin të kishin qasje në një platformë të re të paralajmëruar të zbatimit të ligjit ndërkombëtar të BE-së "brenda dy ose tre vjetëve”.

Por tani Matthew Rycroft, sekretari i përhershëm i departamentit, ka thënë se marrja e qasjes në grupet e të dhënave të BE-së është në "një fazë shumë të hershme" dhe nuk pritet të përfundojë para viteve 2027/2028.

Mbretëria e Bashkuar iu bashkua SIS II në prill të vitit 2015. Sistemi siguroi një mekanizëm që shtetet anëtare të BE-së të ndajnë dhe të veprojnë mbi të dhënat në kohë reale, për personat dhe objektet me interes, duke përfshirë personat e kërkuar dhe të zhdukur.

Duke përdorur sistemin, stafi i Forcave Kufitare dhe policia mundën të kërkonin emrat dhe identitetet e të dyshuarve në kohë reale në pajisjet e dorës.

Edhe Botë 1 muaj më parë Sistemit të ri biometrik në kufijtë e BE-së mund t’i duhen deri në dy vjet për t’u stabilizuar

Pas Brexitit, Qeveria u detyrua të shkëputej nga SIS II, por pohoi se po kërkonte një marrëveshje të ardhshme për bashkëpunimin e zbatimit të ligjit midis Mbretërisë së Bashkuar dhe BE-së, që ofronte "aftësi të ngjashme me ato të ofruara nga SIS II".

Qeveria po zhvillon një sistem të ri – të quajtur Platforma Ndërkombëtare e Paralajmërimeve për Zbatimin e Ligjit, ose I-LEAP, përmes të cilit autoritetet e Mbretërisë së Bashkuar mund të përdorin informacione nga Interpoli. Kjo është vlerësuar të kushtojë rreth 90 milionë funte gjatë 10 vjetëve.

Burime policore i kanë thënë The Guardian se sistemi i Interpolit po funksionon, por është dukshëm më i ngadalshëm dhe për këtë arsye nuk po përdoret aq shpesh për të kontrolluar kredencialet e të dyshuarve.