OKB: Afganistani po vuan nga “kriza të shumëfishta” përveç tërmetit

Komisioneri i lartë i OKB-së për refugjatët, Filippo Grandi ka thënë se Afganistani tashmë po vuan nga "kriza të shumëfishta" nën qeverinë e drejtuar nga talebanët.

Grandi ka thënë për Sky Neës se situata në vend është "shumë tragjike", pasi Afganistani tashmë po vuan nga një "thatësirë e madhe", ndërsa Irani ka "kthyer pothuajse 2 milionë njerëz" dhe Pakistani "kërcënon të bëjë të njëjtën gjë".

"Kemi shumë pak informacion deri më tani, por tashmë, raportime për qindra njerëz të vdekur dhe shumë të tjerë të pastrehë", ka thënë ai.

"Është jashtëzakonisht e vështirë të mobilizohen burimet për shkak të talebanëve”, ka shtuar Grandi. 

Mbi 800 persona kanë mbetur të vdekur dhe 2.500 të tjerë të lënduar si pasojë e tërmetit prej 6.0 shkallë të Rihterit që ka goditur lindjen e Afganistanit të dielën vonë.

Raportohet se fshatra të tëra janë shndërruar në gërmadha.