Ministri i Jashtëm ukrainas pesimist për bisedimet me homologun e tij rus

Ministri i Punëve të Jashtme të Ukrainës, Dmytro Kuleba, ka thënë se nuk ka pritje të mëdha për takimin me ministrin e Punëve të Jashtme të Rusisë, Sergey Lavrov që do të mbahet në Turqi të enjten.

Kuleba ka thënë në Facebook se ekipi i Ukrainës është duke punuar shumë për të pasur bisedime sa më efikase.

"Por do t'ju them sinqerisht se pritshmëritë e mia janë diskrete. Nuk kam pritshmëri të mëdha, por patjetër që do të përpiqemi të marrim maksimumin prej tyre", vijoi ai.

Kuleba tha se prioritetet e Ukrainës janë një "armëpushim, për të çliruar territoret tona dhe pika e tretë është, natyrisht, zgjidhja e të gjitha çështjeve humanitare. Kjo është një fatkeqësi humanitare e krijuar nga ushtria ruse," shtoi ai.

Kuleba tha se falë forcave mbrojtëse të Ukrainës dhe sanksioneve ndërkombëtare, ai do të shkonte në takimin e Lavrov "me një pozicion të fortë. Ne jemi të fortë, kemi besim".

"Çfarë do të marrim në fund është një çështje tjetër. Kjo varet veçanërisht nga çfarë udhëzimesh dhe direktive do të shkojë zoti Lavrov në këto negociata. Shpresoj se ai do t'i trajtojë këto bisedime me mirëbesim, jo ​​nga një këndvështrim propagandistik, por realisht me detyrën për të gjetur një zgjidhje për t'i dhënë fund kësaj lufte të nisur nga Rusia”, tha Kuleba. “Ky është një moment shumë i rëndësishëm dhe jam i sigurt se si do të përfundojnë këto negociata, ne do ta kalojmë atë me dinjitet, sepse ne jemi ukrainas”, tha ai.