Mbahen funeralet e presidentit dhe zyrtarëve të tjerë iranianë

Funeralet e presidentit të ndjerë të Iranit, ministrit të Jashtëm dhe zyrtarëve të tjerë që vdiqën në një përplasje helikopteri në fillim të kësaj jave u zhvilluan në Teheran të mërkurën. 

Shërbimi funeral për presidentin Ebrahim Raisi dhe të tjerët pa një pjesëmarrje që shikuesit e përshkruan si dukshëm më të ulët se procesioni i vitit 2020 për nder të gjeneralit të Gardës Revolucionare Qassem Soleimani, i cili u vra në një sulm me dron të SHBA-së në Bagdad, raporton AP.

Shumë nga pjesëmarrësit thanë se erdhën në Teheran për ceremoninë nga qytete dhe qyteza të tjera anembanë Republikës Islamike, një tregues se si ata në kryeqytetin e Iranit e shihnin Raisin, i cili fitoi presidencën me një pjesëmarrje shumë të ulët, dhe më vonë mbikëqyri goditjet e përsëritura ndaj disidencës, përfshirë edhe pas vdekjes së Mahsa Aminit në vitin 2022, që shkaktoi protesta.

Vdekja e Raisit, ministrit të Jashtëm, Hossein Amirabdollahian dhe gjashtë të tjerëve si pasojë e rrëzimit të helikopterit të dielën vjen në një moment politikisht të ndjeshëm për Iranin, brenda dhe jashtë vendit. 

Raisi, i cili ishte 63 vjeç, ishte diskutuar si një pasardhës i mundshëm i liderit suprem të Iranit, 85-vjeçarit Khamenei. 

Asnjë nga presidentët e kaluar të gjallë të Iranit, përveç Khamenei, i cili ishte president nga 1981 deri në 1989, nuk është parë në pamjet televizive shtetërore të lutjeve të së mërkurës. Autoritetet nuk dhanë asnjë shpjegim për mungesën e tyre të dukshme.

Pas rrëzimit vdekjeprurës të helikopterit, Irani caktoi 28 qershorin si zgjedhjet e ardhshme presidenciale. 

Për momentin, nuk ka asnjë favorit të qartë për pozicionin në mesin e elitës politike të Iranit – veçanërisht askush që është një klerik shiit, si Raisi. 

Gjatë mandatit të Raisit, Irani nisi një sulm të paprecedentë ndaj Izraelit muajin e kaluar, ndërsa lufta e tij kundër Hamasit në Rripin e Gazës vazhdon. 

Irani ka mbështetur Hamasin gjatë gjithë luftës dhe ka ofruar armatime për militantët.