Macroni pritet ta adresojë krizën globale të ushqimit gjatë qëndrimit në Afrikë

Presidenti i Francës, Emmanuel Macron, pritet të diskutojë rreth krizës së ushqimit, të shkaktuar nga lufta në Ukrainë, gjatë turneut të tij katër-ditor në vendet afrikane: Kamerun, Benin dhe Guinea Bissau, ka bërë të ditur të martën Pallati Elysee.

“Pasojat e luftës në Ukrainë ndjehen fuqishëm në kontinentin afrikan, i cili është shumë i varur nga eksportet bujqësore ukrainase. Udhëtimi do të jetë një mundësi për të forcuar qëndrueshmërinë tonë kolektive ndaj krizave ushqimore dhe për të promovuar investimet afatgjata në bujqësi në vendet e cenueshme, veçanërisht në Afrikë”, ka thënë një zëdhënës i Pallatit, njoftoi CNN.

Macroni do të takohet me presidentin 89-vjeçar të Kamerunit, Paul Biya, të martën.

Ky është udhëtimi i parë i një presidenti francez në këtë shtet, që nga viti 2015.

Kombet e Bashkuara kanë paralajmëruar se deri në 49 milionë njerëz mund të futen në krizë urie për shkak të ndikimit shkatërrues të luftës në furnizim dhe çmimet globale të ushqimit.

Edhe Botë 7 shk 2022 Macron udhëton drejt Rusisë për të diskutuar me Putinin rreth Ukrainës

Gjatë turneut të tij - i cili filloi të hënën, Macroni do të flasë gjithashtu për sigurinë dhe kërcënimin terrorist që vazhdon të përhapet në të gjithë Sahelin dhe Afrikën Perëndimore.

Ministri i Jashtëm rus, Sergej Lavrov, gjithashtu po viziton Afrikën, duke kërkuar mbështetje mes zemërimit global për krizën ushqimore, pas bllokadës së Moskës ndaj porteve ukrainase. Ai ka vizituar Egjiptin që është importuesi më i madh në botë i grurit dhe Republikën e Kongos.