Lvivi goditet sërish nga raketat ruse, qyteti mbetet pa energji elektrike

Raketat ruse kanë goditur zona të rëndësishme infrastrukturore të Lvivit të martën në Ukrainë, duke lënë shumë pjesë të qytetit pa energji elektrike, ka bërë të ditur kryetari i bashkisë së qytetit, Andriy Sadovyi.

Lvivi, i cili ndodhet në perëndim të Ukrainës, shumë afër kufirit me Poloninë, është goditur rëndë të hënën nga raketat ruse, duke mbetur pjesa më e madhe e banorëve edhe pa ujë, raportoi BBC-ja të martën.

Qyteti ka rikthyer 95 për qind të furnizimit me energji elektrike mbrëmjen e së hënës së bashku me 70 për qind të furnizimit me ujë, por pas sulmeve të së martës, 30 për qind e Lvivit është sërish pa energji elektrike, ka bërë të ditur Sadovyi në Telegram.

Rusia ka intensifikuar sulmet në disa qytete të Ukrainës pas dëmtimit të urës që lidh Krimenë me Rusinë tri ditë më parë.

Të hënën forcat ruse kanë hedhur raketa mbi Kiev, Lviv, Dnipros e Zaporizhzhia, duke lënë të paktën 14 të vdekur, e shumë të tjerë të plagosur.