Një sulm masiv rus gjatë natës ka goditur Ukrainën, duke lënë të paktën tre persona të vrarë dhe rreth 30 të plagosur, sipas autoriteteve ukrainase. Sulmet kishin në shënjestër kryesisht infrastrukturën energjetike, duke shkaktuar ndërprerje të mëdha të energjisë elektrike në mbarë vendin.
Ministria e Energjisë e Ukrainës njoftoi se mbi 500 mijë familje vetëm në Kiev kanë mbetur pa energji, ndërsa pjesa tjetër e familjeve të prekura gjenden në rajonet përreth kryeqytetit. Sipas Ministrisë, dëmet janë rezultat i sulmeve të koordinuara me raketa dhe dronë ndaj subjekteve kyçe energjetike në kryeqytet dhe në disa rajone të tjera.
Presidenti ukrainas, Volodymyr Zelensky, u bëri thirrje aleatëve perëndimorë që të forcojnë urgjentisht mbrojtjen ajrore të vendit, duke paralajmëruar se Rusia po intensifikon goditjet në prag të dimrit.
Zyrtarët ukrainas deklaruan se Rusia lëshoi 36 raketa dhe gati 600 dronë gjatë natës së së shtunës. Forcat Ajrore të Ukrainës thanë se arritën të rrëzonin 558 dronë dhe 19 raketa.
Përveç dëmeve në infrastrukturën energjetike, sulmet kanë goditur edhe ndërtesa banimi, duke shkaktuar dëme të konsiderueshme materiale. Që nga fillimi i pushtimit rus në shkurt 2022, Kievi dhe qytetet e tjera kryesore të Ukrainës janë përballur vazhdimisht me bombardime ajrore.