Hendbollistët e Kosovës patën nisje të shkëlqyer ndaj favorites së Grupit 4, Hungarisë, në ndeshjen e xhiros së dytë të kualifikimeve për “Euro 2028”.
Por në fund, Kosova u mposht thellë 34:20, në ndeshjen që u zhvillua në palestrën “Bill Clinton” në Ferizaj.
Hungaria tani ka dy fitore nga po aq ndeshje të luajtura. Kosova i ka dy humbje.
Në ndeshjen e parë në Torashvn, u mposht nga Ishujt Faroe, 37:30.
Kosovës i ndihmoi përkrahja e madhe e tifozëve në palestrën e mbushur plot në Ferizaj.
Edhe
Futsall, Kosova mposhtet nga Italia
“Dardanët” në 12 minutat e para të ndeshjes ishin vazhdimisht në epërsi, me golat e Olsi Mulajt, Bujar Ramosajt, Drenit Tahirukajt, Shaban Zogajt e Alban Hazirit.
Por në vazhdimin e ndeshjes, hungarezët u mobilizuan në mbrojtje dhe patën sulm më efikas, ndonëse në fillim në disa raste golat ua mohoi portieri Haris Berisha. Hungaria doli në epërsi 8:7 pas 15 minutash lojë dhe më nuk lejoi befasi.
Pjesën e parë, hungarezët e mbyllën me pesë gola dallim, 17:12. Në pjesën e dytë e thelluan dallimin në rezultat dhe iu gëzuan fitores me 14 gola dallim, 34:20.
Shaban Zogaj dhe Drenit Tahirukaj e mbyllën ndeshjen me nga pesë gola. Katër i kishte Olsi MUlaj, ndërsa tri i shënoi Matej Taci. Nga një gol realizuan Sadat Pajaziti, Bujar Ramosaj dhe Armend Alaj.
Portieri Berisha i pati nëntë pritje nga 31 tentime.
Te Hungaria më i miri në ndeshje ishte Bence Krakovszki me 10 gola në 13 tentime.
Edhe
Kosova mposhtet nga Ishujt Faroe në nismë të kualifikimeve për Euro 2028
Portieri Laszlo Bartucz i pati 14 pritje nga 34 gjuajtje.
Ndeshjen e radhës, Kosova e luan më 10 mars ndaj Malit të Zi. Hungaria luan në udhëtim tek Ishujt Faroe.
