Përfaqësuesja e Kosovës në futsall është mposhtur të premten mbrëma nga Italia në ndeshjen dramatike me rezultatin 4:3 në Pallatin e Rinisë dhe Sportit në Prishtinë.
Ishte ndeshja e dytë e Grupin 10 të “raundit kryesor” për kualifikim në Kupën e Botës 2028.
“Dardanët” në ndeshjen e parë fituan ndaj Gjeorgjisë.
Michele Podda, Giovanni Pulvirenti, Carmelo Musumeci dhe Giuliano Fortini i shënuan golat për Italinë.
Kosova realizoi tre gola, me Ramadan Alajn që shënoi dy herë, ndërsa një gol tjetër u shënua nga Fitim Krasniqi.
Menjëherë më 10 nëntor, Kosova e luan ndeshjen kthyese ndaj Italisë, ndërsa e mbyll këtë kampanjë kualifikuese më 24 shkurt ku e pret Gjeorgjinë.
Vetëm fituesit e 12 grupeve sa janë gjithsej dhe katër më të mirat e vendeve të dyta bëjnë vend për në “Elite Round”. Tetë përfaqësueset e tjera të vendeve të dyta do ta kërkojnë kualifikimin tutje nëpërmjet plejofit. Vetëm katër prej tyre avancojnë po ashtu në raundin e fundit të kualifikimeve.
Italia i prin grupit me gjashtë pikë. Kosova ka tri pikë në vendin e dytë, kurse Gjerogjia është në pozitën e fundit pa pikë.