Kryeministri sllovak akuzon kancelarin gjerman për shantazh lidhur me Ukrainën

Kancelari gjerman, Friedrich Merz, ka sinjalizuar se do të bllokojë buxhetin shtatëvjeçar të Bashkimit Evropian, nëse nuk arrihet një marrëveshje për ndihmën financiare për Ukrainën. Kjo ka nxitur akuza për “shantazh tipik” nga disa liderë të tjerë evropianë dhe ka paralajmëruar përplasje të ashpra në bisedimet që do të zhvillohen më vonë gjatë këtij muaji.

Ndërhyrja e kancelarit gjerman ka zemëruar liderët e Evropës Qendrore, vendet e të cilëve përfitojnë më shumë fonde nga BE-ja sesa kontribuojnë, por që nuk duan të marrin pjesë në një rund të ardhshëm financimi për të mbështetur përpjekjet e Ukrainës në luftë.

“Veprimi i kancelarit është shantazh tipik dhe unë nuk do t’i nënshtrohem”, ka deklaruar kryeministri sllovak, Robert Fico, i cili njihet për qëndrimet miqësore ndaj Rusisë, para gazetarëve në Bratislavë.

Ai ka folur në krah të homologut të tij çek, Andrej Babis, qeveria populiste e të cilit gjithashtu kundërshton pjesëmarrjen në një kredi të ardhshme për Ukrainën.

“Nuk e di pse po e thotë këtë”, ka deklaruar Babis, duke iu referuar qëndrimit të Merzit.
Merzi dëshiron që liderët e BE-së t'i diskutojnë nevojat financiare të Ukrainës në një samit që do të mbahet të premten në Dublin.

“Ne duhet të vazhdojmë ta mbështesim Ukrainën në luftën e saj për të mbrojtur veten. Kjo është në interesin tonë jetik të përbashkët”, ka shkruar ai në një letër drejtuar presidentit të Këshillit Evropian, Antonio Costa, i cili do ta kryesojë takimin. Letra është siguruar nga gazeta The Guardian.

“Megjithatë, ndihma dypalëshe për Ukrainën shpërndahet në mënyrë të pabarabartë dhe barra bie kryesisht mbi vetëm disa shtete anëtare”, ka theksuar Merz.

BE-ja vitin e kaluar ka rënë dakord t’i japë Ukrainës një kredi prej 90 miliardë eurosh, e cila synonte të mbulonte dy të tretat e shpenzimeve të saj ushtarake dhe civile për vitet 2026 dhe 2027.

Megjithatë, që atëherë, bombardimet e pandërprera të Rusisë i kanë shtuar edhe më shumë kostot Ukrainës, duke e shtyrë presidentin Volodymyr Zelensky të kërkojë 70 miliardë euro për të mbuluar deficitin buxhetor.