Koreja e Veriut ka arrestuar tre zyrtarë të kantierit detar për një aksident gjatë lansimit të luftanijes të mërkurën, raporton televizioni shtetëror verikorean, transmeton “BBC”.
Gjatë lëshimit në det të anijes 5000-tonëshe, pjesa e poshtme u dëmtua dhe anija doli nga ekuilibri.
Lideri verikorean Kim Jong Un e përshkroi atë si “akt kriminal”.
Agjencia verikoreane e lajmeve, KCNA, tha se të arrestuarit janë kryeinxhinieri i kantierit detar të Chongjin ku ishte ndërtuar anija, si dhe kreu i ndërtimit të anijes dhe një menaxher administrativ.
Thuhet se të tre “ishin përgjegjës për incidentin”.
Të premten, KCNA kishte njoftuar se menaxheri i kantierit detar, Hong Kil Ho, ishte thirrur nga forcat e rendit.
Imazhet satelitore tregojnë anijen e shtrirë anash ndërsa është mbuluar me mbulesa të mëdha të kaltra. Një pjesë e anijes duket se është në tokë.
Në mediume nuk është përmendur ndonjë i lënduar apo viktimë në rastin.
