-
Përktheu:
Flutura Gashi-Mehmeti
- 3 mars 2026 16:33
- Shpërndaje në:
Katari ka thënë të martën se “janë tejkaluar të gjitha vijat e kuqe”, nga sulmet iraniane në territorin e tij, dhe se goditjet ndaj sovranitetit të shtetit “nuk do të mbeteshin pa përgjigje”.
"Sulmet ndaj sovranitetit tonë janë të vazhdueshme. Ka sulme ndaj infrastrukturës. Ka sulme ndaj zonave tona të banimit. Dhe efektet e këtyre sulmeve janë shumë të qarta. Dhe për këtë arsye, ne nuk supozojmë se ka më vija të kuqe për t'u kaluar kur sovraniteti ynë është shënjestruar në këtë mënyrë", u ka thënë gazetarëve Majed Al-Ansari, zëdhënës i ministrisë së Jashtme të Katarit, gjatë një takimi informues në Doha.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo"Kur bëhet fjalë për hakmarrje të mundshme, siç thashë, të gjitha opsionet janë me udhëheqjen tonë", ka shtuar ai.
Irani ka goditur shumë vende të konsideruara si strehë të sigurta në Lindjen e Mesme, në hakmarrje për sulmet SHBA-Izrael në Teheran gjatë fundjavës që vranë udhëheqësin suprem iranian, Ajatollah Ali Khamenei.
Al-Ansari u ka thënë gazetarëve se ka pasur përpjekje nga Irani për të shënjestruar Aeroportin Ndërkombëtar Hamad, por "të gjitha u penguan dhe raketat u rrëzuan dhe asnjëra prej tyre nuk ka arritur në aeroport".
Al-Ansari ka shtuar se konflikti dhe shënjestrimi i infrastrukturës së naftës dhe gazit nga Irani është "një rrezik i madh për ekonominë ndërkombëtare".
Irani ka goditur objekte energjitike në Katar dhe Arabinë Saudite, dhe ka sulmuar disa anije në
Ngushticën e Hormuzit, grykëderdhjen e ngushtë të Gjirit Persik, përmes së cilës kalon një e pesta e të gjithë naftës së tregtuar, duke rritur çmimet globale të naftës dhe gazit natyror.
Intensiteti i sulmeve SHBA-Izrael ndaj Iranit, vrasja e Khameneit dhe mungesa e ndonjë plani të dukshëm daljeje, përgatitën terrenin për një konflikt të zgjatur me pasoja të gjera.
Pa asnjë shenjë se konflikti do të zbutet së shpejti, presidenti i SHBA-së Donald Trump, ka thënë se operacionet ka të ngjarë të zgjasin katër deri në pesë javë, por se ai ishte i përgatitur "të zgjasnin shumë më tepër se kaq".
Në një shenjë shqetësimi për potencialin e dhunës në rritje, Departamenti i Shtetit të hënën u ka kërkuar qytetarëve amerikanë të largohen nga dhjetëra vende të Lindjes së Mesme për shkak të rreziqeve të sigurisë.
