Kabineti i Netanyahut mblidhet të martën për ta votuar armëpushimin me Hezbollahun

Një zyrtar i lartë izraelit ka thënë të hënën se kabineti i qeverisë izraelite do të mblidhet të martën për të miratuar një marrëveshje armëpushimi me Hezbollahun, teksa një zyrtar libanez ka thënë se Bejrutit i ishte thënë nga Uashingtoni se një marrëveshje mund të shpallej "brenda disa orësh".

Zyrtarët izraelitë kanë deklaruar më herët se një marrëveshje për t'i dhënë fund luftës po afrohej edhe pse disa çështje nuk janë finalizuar, raporton Reuters.

Faqja e internetit amerikane e lajmeve Axios, duke cituar një zyrtar të lartë të paidentifikuar amerikan, ka thënë se Izraeli dhe Libani kishin rënë dakord për kushtet e një marrëveshjeje dhe një zyrtar i lartë izraelit i ka thënë Reuters se takimi i së martës ka për qëllim miratimin e saj.

Ambasadori i Izraelit në Kombet e Bashkuara, Danny Danon, ka thënë se Izraeli do të ruajë aftësinë për të goditur Libanin jugor sipas çdo marrëveshjeje.

SHBA-të kanë punuar intensivisht javëve të fundit për një marrëveshje për t'i dhënë fund armiqësive gjatë një viti midis Hezbollahut të mbështetur nga Irani dhe Izraelit që shpërthyen paralelisht me luftën e Izraelit kundër grupit islamik palestinez Hamas në Gaza.