-
Përktheu:
Flutura Gashi-Mehmeti
- 3 dhjetor 2025 08:55
- Shpërndaje në:
Shërbimet mjeko-ligjore izraelite kanë arritur në përfundimin se mbetjet e dorëzuara nga Hamasi të martën nuk ishin ato të dy pengjeve të fundit që mbaheshin në Gazë, ka bërë të ditur zyra e kryeministrit të Izraelit.
Hamasi kishte dorëzuar mbetjet te Kryqi i Kuq si ato të njërit prej dy pengjeve të fundit të vdekur që ndodheshin edhe në Gazë.
Forcat izraelite kanë thënë se dërguan për testim mjeko-ligjor mbetjet që i përshkruan si "gjetje".
"Gjetjet e sjella dje për ekzaminim nga Rripi i Gazës nuk lidhen me asnjë nga pengjet e vdekura”, ka thënë zyra e kryeministrit Benjamin Netanyahu në një deklaratë të mërkurën.
Identifikimi ishte bërë në Qendrën Kombëtare për Mjekësi Ligjore, ka shtuar ajo.
Dy pengjet e mbetura të vdekura janë oficeri i policisë izraelite, Ran Gvili dhe shtetasi tajlandez, Sudthisak Rinthalak, të dy të rrëmbyer gjatë sulmit të Hamasit më 7 tetor 2023 ndaj Izraelit, i cili shkaktoi dy vjet luftë shkatërruese në Gaza.
Kryqi i Kuq me seli në Gjenevë ka vepruar si ndërmjetës midis grupeve militante në Gazë dhe Izraelit gjatë gjithë luftës së shkaktuar nga sulmi i Hamasit, duke ndihmuar në hapjen e rrugës për lirimin e pengjeve të gjalla dhe dorëzimin e mbetjeve mortore.