-
Përktheu:
Flutura Gashi-Mehmeti
- 4 dhjetor 2025 08:43
- Shpërndaje në:
Izraeli ka identifikuar trupin që mori nëpërmjet Kryqit të Kuq të mërkurën si punëtori bujqësor tajlandez 43-vjeçar, Suthisak Rintalak, sipas zyrës së kryeministrit.
Rintalak ishte një nga dy pengjet e fundit të vdekura që ende ndodheshin në Gazë. Trupi i pengut të fundit të mbetur, Ran Gvili, një oficer policie izraelit 24-vjeçar, mbetet në Gazë.
Izraeli mori arkivolin që mbante Rintalak pasi krahu ushtarak i Xhihadit Islamik Palestinez (PIJ) tha se kishte gjetur trupin e një pengu në Gazën veriore.
Dorëzimi erdhi disa orë pasi zyra e kryeministrit izraelit tha se testet treguan se një grup tjetër mbetjesh të marra nga Hamasi të martën nuk i përkisnin asnjërit prej pengjeve të vdekur.
Forcat e Mbrojtjes së Izraelit (IDF) thanë se informuan familjen e Rintalak për lajmin dhe shprehën "ngushëllimet e tyre të thella".
Ata shtuan se do të vazhdojnë të kërkojnë kthimin e trupit të Gvili sa më shpejtë që të jetë e mundur.
Sipas fazës së parë të marrëveshjes së armëpushimit të ndërmjetësuar nga SHBA-ja, e cila hyri në fuqi më 10 tetor, Hamasi ra dakord të kthejë 20 pengjet e gjalla izraelite dhe trupat e 28 pengjeve të vdekura izraelite dhe të huaja që ndodheshin ende në Gazë brenda 72 orëve.
Të gjithë pengjet e gjalla u liruan më 13 tetor në këmbim të 250 të burgosurve palestinezë dhe 1,718 të paraburgosurve nga Gaza.
Deri më tani, janë dorëzuar eshtrat e 23 pengjeve të vdekura izraelite, së bashku me ato të katër pengjeve të huaja, dy prej tyre tajlandezë, një nepalez dhe një tanzanian.
Në këmbim, Izraeli ka dorëzuar trupat e 345 palestinezëve të vrarë gjatë luftës.
Izraeli ka akuzuar Hamasin për vonesë të qëllimshme të nxjerrjes së trupave të pengjeve, ndërsa Hamasi ka këmbëngulur se po përpiqet t'i gjejë ato nën rrënoja.
Progresi i ngadaltë ka nënkuptuar se nuk ka pasur përparim në fazën e dytë të planit të paqes për Gazën të presidentit të SHBA-së, Donald Trump.
Faza e dytë parasheh mënyrën e qeverisjes së Gazës, tërheqjen e trupave izraelite, çarmatimin e Hamasit dhe rindërtimin.