Teherani ka paraqitur një propozim të ri për zhbllokimin e Ngushticës së Hormuzit dhe rifillimin e bisedimeve për programin bërthamor. Marrëveshja do të hynte në fuqi brenda shtatë ditësh, nëse Shtetet e Bashkuara heqin bllokadën detare dhe lehtësojnë sanksionet ndaj naftës iraniane
Irani ka ofruar rihapjen e Ngushticës së Hormuzit dhe rifillimin e bisedimeve për programin e tij bërthamor brenda shtatë ditësh, nëse Shtetet e Bashkuara heqin bllokadën detare, pezullojnë sanksionet ndaj shitjeve të naftës iraniane dhe respektojnë një armëpushim që do të përfshinte edhe Libanin.
Propozimi është paraqitur nga ministri i Jashtëm iranian, Abbas Araghchi, gjatë një takimi privat të enjten në New York, në margjinat e Asamblesë së Përgjithshme të Kombeve të Bashkuara. Sipas një prej pjesëmarrësve në takim, Araghchi ka paraqitur kushtet e Teheranit për një marrëveshje të re me Washingtonin.
Trita Parsi, nënkryetar ekzekutiv i institutit kërkimor Quincy Institute, i cili mori pjesë në takim, ka bërë të ditur se Araghchi ka sugjeruar që një marrëveshje e shpejtë mund t’i sjellë përfitime politike presidentit amerikan, Donald Trump, para zgjedhjeve afatmesme të nëntorit.
Deri tani, misioni iranian në Kombet e Bashkuara dhe zyrtarë të tjerë të Teheranit nuk kanë dhënë ndonjë koment zyrtar për këtë propozim.
Propozimi i ri ngjan shumë me një memorandum mirëkuptimi të arritur në qershor, por këtë herë me një afat shumë më të shkurtër për zbatimin e tij. Marrëveshja e mëparshme parashikonte një periudhë të përkohshme prej 60 ditësh, por ajo u rrëzua shpejt pasi Irani rifilloi sulmet ndaj anijeve në Ngushticën e Hormuzit.
Edhe
Irani thotë se Hormuzi hapet brenda dy ditësh nëse SHBA-ja pranon kërkesat e tij
Presidenti amerikan, Donald Trump, ka deklaruar se nuk është me nxitim për të arritur një marrëveshje me Iranin. Megjithatë, çmimet e larta të naftës po ndikojnë në rritjen e inflacionit dhe po e bëjnë më të shtrenjtë koston e jetesës në Shtetet e Bashkuara.
Në anën tjetër, mbetet e paqartë nëse forcat më konservatore që kanë ndikim të madh në strukturat iraniane të sigurisë do t’i pranojnë kompromiset e mbështetura nga figura më të moderuara, përfshirë presidentin Masoud Pezeshkian.
Sipas Trita Parsit, nëse Trumpi vlerëson se një marrëveshje e tillë mund t’i sjellë përfitime politike para zgjedhjeve afatmesme dhe të ndihmojë në uljen e çmimeve të karburanteve, atëherë mund të ketë më shumë hapësirë për kompromis nga të dyja palët.
Megjithatë, ai ka paralajmëruar se ekziston mosbesim i thellë, veçanërisht për mundësinë që Irani ta përdorë marrëveshjen vetëm për të fituar kohë, për të rritur eksportet e naftës dhe për të lehtësuar presionin ekonomik.
Një tjetër shenjë e lëvizjeve diplomatike u regjistrua të premten, kur presidenti iranian Masoud Pezeshkian priti kryeministrin e Katarit. Katari ka luajtur rol të rëndësishëm si ndërmjetës mes Iranit dhe Shteteve të Bashkuara, përfshirë edhe gjatë bisedimeve indirekte që dy vendet zhvilluan këtë javë në New York.
Edhe
Irani i kërkon SHBA-së ta pranojë propozimin për rihapjen e Ngushticës së Hormuzit
Ende nuk është bërë e qartë se sa gjatë do të qëndrojnë Pezeshkian dhe Araghchi në Shtetet e Bashkuara pas fjalimit të presidentit iranian në Asamblenë e Përgjithshme të OKB-së të mërkurën.
Ndërkohë, sekretari amerikan i Shtetit, Marco Rubio, ka thënë se Washingtoni është i gatshëm të shqyrtojë mundësinë për shkëmbim mesazhesh me Teheranin nëse krijohet një mundësi për këtë.
