Emigrantët e dërguar nga Shtetet e Bashkuara në bazën ushtarake të Guantanamos në Kubë u përballën me "kushte abuzive dhe çnjerëzore të paraburgimit" që kanë ndikuar në shëndetin e tyre fizik dhe mendor, duke çuar edhe në përpjekje për vetëvrasje, thuhet në një raport të ri të Human Rights Watch, shkruan CNN.
Sipas raportit, 20 emigrantë venezuelas të mbajtur në Guantanamo në muajin shkurt të mbajtur për një periudhë nga 11 deri në 16 ditë, treguan për përjetime të rënda dhe shkelje të të drejtave të njeriut, jo vetëm gjatë mbajtjes në Guantanamo po edhe para se të dërgoheshin atje.
Të intervistuarit ishin pjesë e grupit prej 177 venezuelasish të ndaluar nga autoritet amerikane dhe të cilët u dërguan në Honduras, para se të deportoheshin përfundimisht në Venezuelë. Disa thanë se u ndaluan pasi kaluan kufirin jugor të SHBA-së vetëm bazuar në kombësinë dhe tatuazhet e tyre, të cilat autoritetet e imigracionit i përdorën për t'i lidhur ata me bandën kriminale Tren de Aragua.
Administrate e presidentit amerikan, Donald Trump, e ka shpallur Tren de Aragua organizatë terroriste.
Qeveria venezuelase ka mohuar se emigrantët janë anëtarë të grupit dhe se të gjithë të dyshuarit janë sjellë para drejtësisë. Departamenti i Sigurisë Kombëtare i SHBA-së, i cili mbikëqyr autoritetin e migracionit, i hodhi poshtë pretendimet e Human Rights Watch.