Dronët ukrainas goditën cisternat me naftë në portin rus të Taganrogut gjatë natës si dhe një depo nafte në qytetin Armavir, thanë të shtunën autoritetet ruse në rajonet jugore të Rostovit dhe Krasnodarit.
Guvernatori i rajonit të Rostovit, Yury Slyusar, tha se zjarret në portin e Taganrogut, një qytet me rreth 240,000 banorë, ishin shuar. Dy persona u plagosën, tha ai.
Kryetarja e bashkisë së qytetit, Svetlana Kambulova, tha se gjendja e jashtëzakonshme lokale, e shpallur më 27 maj, ishte zgjatur.
Në rajonin fqinj të Krasnodarit, autoritetet në Armavir, i cili ka një popullsi prej 185,000 banorësh, thanë se një zjarr në një depo nafte në zonën industriale të qytetit ishte vënë nën kontroll dhe se nuk kishte të lënduar.
Guvernatori i Rostovit, Slyusar, tha se pothuajse 50 dronë janë rrëzuar në rajon, me sulme të raportuara në të gjithë provincën, e cila kufizohet me Donbasin e Ukrainës, ku kohëve të fundit luftimet në mes Rusisë dhe Ukrainës janë fokusuar.
Ai shtoi se jashtë Taganrogut, u raportuan vetëm dëme të vogla.
