Diaspora ukrainase i përgjigjet thirrjes së vendlindjes

“Ne duhet të mbrojmë atdheun tonë. Kush tjetër nëse jo ne?” – ka thënë një burrë me mustaqe përpara një grupi prej rreth 20 shoferësh kamionësh ukrainas, që po ecnin në pikën e kontrollit për të hyrë në Ukrainë. Ata erdhën nga e gjithë Evropa për t'u kthyer në Ukrainë. Një burrë tjetër në grup tha: “Rusët duhet të kenë frikë. Ne nuk kemi frikë”

Ndërsa qindra mijëra ukrainas po zhvendosen nga vendi i tyre, disa burra dhe gra ukrainase po kthehen në vendlindje nga e gjithë Evropa për të ndihmuar në mbrojtjen e atdheut të tyre përballë pushtimit rus.

Roja Kufitare e Polonisë njoftoi të dielën se rreth 22.000 njerëz kanë kaluar në Ukrainë që nga e enjtja, kur Rusia pushtoi vendin.

“Kush tjetër nëse jo ne?”

Në pikën e kontrollit në Medyka, në Poloninë juglindore, shumë prej tyre pritën në rresht herët të dielën për të kaluar në Ukrainë.

“Ne duhet ta mbrojmë atdheun tonë. Kush tjetër nëse jo ne?” – ka thënë një burrë me mustaqe përpara një grupi prej rreth 20 shoferësh kamionësh ukrainas, që po ecnin në pikën e kontrollit për të hyrë në Ukrainë. Ata erdhën nga e gjithë Evropa për t'u kthyer në Ukrainë.

Një burrë tjetër në grup tha: “Rusët duhet të kenë frikë. Ne nuk kemi frikë”.

Anëtarët e grupit nuk pranuan të japin emrat e tyre, ose dhanë vetëm emrat e tyre të parë, duke përmendur sigurinë e tyre dhe atë të familjeve të tyre.

Denisi, 28 vjeç, i cili ka kaluar gjashtë muaj duke punuar në kantieret e ndërtimit në Poloni, tha se po kthehej në Ukrainë ku ndodhet "gjithçka" e tij.

“Unë jam vetëm këtu në Poloni. Pse duhet të jem këtu? Kështu që unë shkoj për atdheun”, tha Denisi, me një flamur të vogël kombëtar të Ukrainës blu-verdhë në xhaketën e tij të dimrit.

“Dua të kthehem për t'u bashkuar me ushtrinë, për të luftuar. Do të shohim, shpresojmë se do të fitojmë”, tha ai.

“Rusët po vrasin fëmijët tanë”

Në qytetin e afërt të Przemysl, Janiel, 27 vjeç, po përgatitej gjithashtu të kthehej. Inxhinier me profesion, ai ka punuar në ndërtim në Poloni, por nuk mund të qëndronte duke ditur se atdheu i tij po sulmohej.

“Kam folur me prindërit e mi dhe kam qarë. Dhe thjesht vendosa me vete se nuk mund ta shikoj atë dhe nuk mund të qëndroj në Poloni pasi rusët po shkatërrojnë pavarësinë tonë, po shkatërrojnë qytetet tona, po vrasin qytetarët tanë, po vrasin fëmijët tanë, vrasin të moshuarit tanë", tha ai për AP-në.

Para eksodit të fundit, kishte të paktën 1 milion ukrainas në Poloni, që punonin ose studionin. Gratë shpesh punojnë si dado dhe kujdestare për të moshuarit në të gjithë Bashkimin Evropian dhe në shumë raste i lënë fëmijët e tyre në Ukrainë te gjyshërit ose të afërmit e tjerë.

Lesa, 36 vjeçe, nga Lviv, foli për AP-në pak para se të hynte në ndërtesën e pikës së kontrollit, bashkë me vëllanë e saj në Ukrainë.

“Kam frikë, por jam nënë dhe dua të jem me fëmijët e mi. Çfarë mund të bësh? Është e frikshme, por duhet”, tha ajo.

Një tjetër grua e re, Alina, tha se po kthehej për të marrë fëmijët e saj dhe për t'i çuar në Poloni.

"Duhet, ne ukrainasit duhet t'i marrim fëmijët tanë... për t'i lejuar djemtë tanë të luftojnë", tha ajo.

Në anën e kufirit të Ukrainës, një burrë po i drejtonte ata që mbërrinin në një vend ku makinat dhe autobusët prisnin për t'i çuar përpara.

Mbështetja çeke

Republika Çeke, e cila kufizohet me Poloninë në jugperëndim, po planifikon të mbështesë familjet ukrainase që jetojnë në vend, burrat e të cilave vendosin të kthehen në shtëpi për të luftuar.

Ministria e Punës dhe Çështjeve Sociale po përgatit shpërblime për familjet që do të humbnin të ardhurat nëse "burrat duhet të bashkohen me ushtrinë (ukrainase)", tha ministri Marian Jurecka.

Ka rreth 200.000 punëtorë ukrainas në Republikën Çeke, shumica e tyre burra.

Hekurudhat çeke thanë se burrat ukrainas që udhëtojnë për në Ukrainë mund të marrin çdo tren pa pagesë. Ata duhet të udhëtojnë përmes Polonisë ose Sllovakisë për të arritur në Ukrainë.

Presidenti ukrainas, Volodymyr Zelenskyy, ka qëndruar në kryeqytetin Kiev, duke rritur moralin e luftëtarëve ukrainas, ndërsa trupat ruse po afroheshin në qytet dhe shpërthime të mëdha ndriçuan qiellin herët të dielën. Zelenskyy ua ka ndaluar burrave të moshës ushtarake, nga 18 deri në 60 vjeç, të largohen nga vendi.

Thirrja për vullnetarë

Autoritetet ukrainase u kanë bërë thirrje gjithashtu vullnetarëve të huaj që të vijnë dhe të luftojnë në mbrojtjen e Ukrainës.

Në Izrael, mediat raportuan se Ambasada e Ukrainës atje kishte postuar një thirrje për këdo që dëshiron të bashkohet në luftën kundër Rusisë për të udhëtuar në Ukrainë. Ftesa, e shënuar "Urgjente" në faqen e ambasadës në Facebook, u hoq më vonë, raportuan mediat.

Udhëheqësit izraelitë janë të kujdesshëm në mënyrën se si flasin për agresionin e Rusisë kundër Ukrainës. Vendi është shtëpia e qindra mijëra njerëzve me rrënjë në Ukrainë ose Rusi, ose në të dyja vendet, dhe ka kërkuar lidhje të mira me Moskën dhe Kievin.

Të paktën 368.000 njerëz janë larguar nga Ukraina në Poloni dhe vende të tjera fqinje pas pushtimit rus, tha të dielën agjencia e OKB-së për refugjatët, UNHCR.

Garda kufitare e Polonisë tha se rreth 156.000 njerëz kanë hyrë nga Ukraina që nga e enjtja, kur filloi pushtimi, ndërsa rreth 22.000 kanë shkuar në drejtim të kundërt.