Detektimi i dronëve ndërpret përkohësisht trafikun në aeroportin e Oslos

Aeroporti i Oslos në Norvegji ka pezulluar përkohësisht një ose disa ulje të avionëve herët në mëngjesin e së hënës, pas një raportimi për praninë e dronëve pranë aeroportit, sipas operatorit Avinor, raporton Reuters.

“Një ose më shumë avionë qëndruan në ajër deri sa situata u sqarua. Asnjë avion nuk u devijua drejt aeroporteve alternative”, ka njoftuar një zëdhënës i Avinorit.

Agjencia norvegjeze e lajmeve raportoi, duke cituar policinë, se rreth mesnatës kishin marrë një raport nga një pilot i Norwegian Air, i cili mendoi se pa tre deri në pesë dronë gjatë përgatitjes për aterrim në aeroport.

Avinor bëri të ditur se nuk ka pasur ndërprerje të mëtejshme në trafikun ajror.

Agjencia e lajmeve raportoi, duke cituar policinë, se vëzhgimi mbetet i pa verifikuar.

Aviacioni evropian është përballur disa herë me kaos javët e fundit për shkak të detektimit të dronëve dhe shkeljeve të hapësirës ajrore, përfshirë në aeroportin e  Kopenhagës, Oslos dhe atë të Munihut.