Dështojnë bisedimet SHBA-Kanada, Carney thotë se do të përgjigjet me të njëjtën monedhë

Një valë e re tarifash amerikane për një gamë të gjerë mallrash kanadeze ka hyrë në fuqi të shtunën pas një ndërprerjeje të minutës së fundit në bisedimet tregtare. Duke njoftuar pezullimin e negociatave pak para afatit të së premtes në mbrëmje, kryeministri kanadez Mark Carney tha se do të vendoste tarifa reciproke për mallrat amerikane "dollar për dollar". 

Carney tha se ndryshimet e minutës së fundit në kushtet e propozuara nga SHBA-ja ishin të padrejta, joekonomike dhe vunë në pikëpyetje besueshmërinë e çdo marrëveshjeje. Negociatorët tregtarë ishin angazhuar në bisedime intensive që nga korriku, pasi presidenti amerikan, Donald Trump kërcënoi të vendoste një taksë prej 50% për gati 20 miliardë dollarë importe kanadeze deri më 19 gusht.

Trump i kishte ndaluar përkohësisht këto tarifa më parë gjatë javës, duke thënë se të dy palët ishin afër nënshkrimit të një marrëveshjeje tregtare që ishte "shumë e mirë" për të dy vendet. Por disa minuta para afatit të fundit për një marrëveshje, Carney tha se ndërsa ishte bërë "përparim i rëndësishëm" në bisedime, nuk ishte e mjaftueshme për të përmbushur objektivat për kanadezët. Ai tha se si rezultat i kësaj ka vendosur pezullimin e negociatave tregtare me SHBA-në dhe i ka udhëzuar negociatorët të kthehen në Ottawa. 

"Ndryshimet e minutës së fundit në kushtet e propozuara nga SHBA-ja ishin të padrejta, joekonomike dhe vunë në pikëpyetje besueshmërinë e çdo marrëveshjeje", theksoi ai.