Dëshpërimi për ikje: Fëmijët afganë u barten ushtarëve britanikë

Prindër të tmerruar afganë janë xhiruar të enjten tek i bartin foshnjat dhe fëmijët e tyre sipër telave me gjemba vendosur përreth aeroportit të Kabulit, teksa i lusin ushtarët britanikë që t’i shpijnë në vende të sigurta.

Skena të rënda kanë vazhduar të shfaqen përreth Afganistanit, që nga rënia e vendit në duart e talebanëve.

Pamjet e fundit, të transmetuara nga agjencia e lajmeve “Associated Press”, e shpërfaqin dëshpërimin e qytetarëve për të ikur nga Afganistani.

Ministri i brendshëm gjerman, Horst Seehofer, ka thënë të enjten se është i bindur se afganët që ikin nga talebanët duhet të ndihmohen në vendin e tyre apo në rajonet fqinje. Porse duke folur gjatë një adresimi për media, ai ka thënë se komuniteti perëndimor ka dështuar në Afganistan.

Që nga rënia e vendit në duart e talebanëve, shtetet perëndimore kanë angazhuar aeroplanë për evakuimin e diplomatëve të huaj dhe të bashkëpunëtorëve të tyre afganë përderisa afganët kanë vërshuar aeroportin e Kabulit në kërkim të shpëtimit.