Charles III do t’u kthehet detyrave pas trajtimit për kancer

Monarku 75-vjeçar, Mbreti Charles III do të rifillojë disa detyra publike javën e ardhshme, pas një pauze tre-mujore për t'u fokusuar në trajtimin dhe rikuperimin e tij pasi u diagnostikua me një lloj kanceri të pazbuluar, ka bërë të ditur Pallati Buckingham të premten.

Charles do të shënojë momentin historik duke vizituar një qendër të trajtimit të kancerit të martën, e para nga disa paraqitje publike që ai do të bëjë në javët e ardhshme, sipas pallatit. 

Një nga angazhimet e tij të para të mëdha do të jetë organizimi i një vizite shtetërore nga perandori dhe perandoresha e Japonisë në qershor, raporton AP.

Pallati ka thënë se mjekët e mbretit janë "shumë të inkurajuar" nga përparimi i tij, megjithëse është shumë herët të thuhet se sa do të zgjasë trajtimi i tij. Nuk janë dhënë detaje se çfarë lloj trajtimi po merr ai.

Charles do të vazhdojë të kryejë të gjitha detyrat e tij shtetërore, duke përfshirë shqyrtimin e dokumenteve qeveritare dhe takimin me kryeministrin Rishi Sunak, siç ka bërë që kur diagnoza e tij u zbulua më 5 shkurt, ka shtuar Pallati.