Kryeministri britanik, Andy Burnham e ka krahasuar rezistencën e Ukrainës kundër Rusisë me luftën e Britanisë kundër Gjermanisë naziste, ndërsa është zotuar të ndihmojë Kievin zyrtar të forcojë mbrojtjen e tij ajrore përpara dimrit.
“Pavarësisht kërcënimeve të papranueshme të Rusisë ndaj vendit tim, ne do të vazhdojmë mbështetjen tonë për Ukrainën”, ka thënë Burnham në një fjalim para katedrales së Shën Sofisë në Kiev, me rastin e 35-vjetorit të pavarësisë së vendit.
“Ky është momenti për të vazhduar presionin ndaj Rusisë, momenti për t’ua kufizuar aftësinë për të financuar këtë luftë të paligjshme”, ka shtuar ai.
Në fjalimin e tij të parë madhor në skenën ndërkombëtare, Burnham ka thënë se fuqia e e popullit ukrainas është mahnitëse.
“Ukraina ka qenë mbrojtësja e Evropës, jo një barrë për sigurinë tonë, por vija e parë e frontit për ta mbajtur Evropën të sigurt. Populli ukrainas meriton jo vetëm mbështetjen tonë të vazhdueshme, por edhe mirënjohjen dhe respektin tonë”, është shprehur ai.
Britania do ta ndihmojë Ukrainën të prodhojë raketa me rreze të gjatë veprimi
Photo: Associated Press
Kryeministri britanik, Andy Burnham, ka thënë të hënën se Mbretëria e Bashkuar do ta ndihmojë Ukrainën të prodhojë raketat e saj me rreze të gjatë veprimi, duke ndarë informacione teknike të klasifikuara mbi komponentët e prodhuar në Britani.
Burnham, i cili ndodhet në Kiev së bashku me liderë të tjerë ndërkombëtarë për Ditën e Pavarësisë së Ukrainës, ka thënë se kishte miratuar kërkesën për ndarjen e teknologjisë së raketave “Storm Shadow”, ndërsa industria britanike dhe ajo franceze do të mbështesin Ukrainën.
“Storm Shadow” e Mbretërisë së Bashkuar është një raketë precize e lëshuar nga ajri, me rreze veprimi prej më shumë se 250 kilometrash.
Ai i ka bërë thirrje industrisë britanike të mbështesë Projektin Freya, “për të ofruar një alternativë me kosto më të ulët ndaj sistemeve amerikane Patriot për interceptimin e raketave balistike”.
Duke folur të hënën nga Kievi përmes një videothirrjeje, presidenti francez, Emmanuel Macron, ka theksuar rëndësinë e dërgimit të kapaciteteve për mbrojtjen kundër raketave balistike në Ukrainë.
Ukraina tashmë është në bisedime me Francën për ngritjen e linjave të montimit të raketave në territorin ukrainas, gjë që do t’i mundësonte Kievit të prodhonte versionin e vet të kësaj arme.
Nuk është e qartë se sa të avancuara janë planet apo kur mund të nisë prodhimi.
Presidenti ukrainas Volodymyr Zelensky ka thënë se vendi kishte nevojë për të paktën 300 raketa Patriot për dimrin.
“Çdo raketë do të thotë se mund të shpëtohen jetë”, ka deklaruar Zelensky.