Blinkeni kërkon ndalimin e luftimeve në Lindjen e Mesme

Sekretari amerikan i Shtetit, Antony Blinken, ka bërë thirrje të mërkurën për ndalimin e luftimeve midis Izraelit dhe grupeve militante Hamas dhe Hezbollah.

Pavarësisht thirrjeve të tij, sulmet e rënda ajrore izraelite në një qytet të madh historik port libanez, treguan se nuk kishte pushim, raporton Reuters.

Izraeli filloi të bombardojë portin e Tirit në Libanin jugor, një vend i listuar në UNESCO, afërsisht tri orë pasi lëshoi një urdhër në internet që banorët të largoheshin nga zonat qendrore. 

Një numër i madh njerëzish ishin larguar tashmë nga Tiro në javët e fundit, teksa Izraeli ka intensifikuar fushatën e tij për ta shkatërruar Hezbollahun në Liban dhe Hamasin në Gaza, të dy aleatë të ngushtë të armikut të tij në Lindjen e Mesme, Iranit. 

Porti është zakonisht një qendër e zhurmshme për jugun, teksa peshkatarët, turistët dhe madje edhe paqeruajtësit e OKB-së ndodhen vazhdimisht atje. Por urdhrat e evakuimit të Izraelit këtë javë kanë përfshirë për herë të parë një pjesë të Tirit, deri në kështjellën e tij të lashtë.

Disa libanezë kanë frikë se vendi i tyre do të përfundojë si Rripi i Gazës, ku sulmet ajrore dhe bombardimet izraelite kanë vrarë dhjetëra mijëra palestinezë dhe kanë rrafshuar pjesën më të madhe të enklavës së vogël me numër të madh të popullsisë.

Blinken, i cili ka udhëtuar rregullisht në Lindjen e Mesme që nga shpërthimi i luftës, ka bërë udhëtimin e tij të parë që kur Izraeli vrau liderin e Hamasit, Yahya Sinwar, armikun e tij më të kërkuar, një vdekje për të cilën Washingtoni shpreson se mund të jetë një shtysë për paqen.