BE-ja vë në dyshim sundimin e ligjit në Hungari dhe Poloni

Përfaqësuesit nga vendet anëtare të BE-së u takuan në Bruksel, ku Këshilli i Çështjeve të Përgjithshme u fokusua te drejtësia në Hungari dhe Poloni.

Hungaria do ta marrë presidencën e Këshillit të BE-së në korrik të vitit 2024, por qeveria e saj nacionaliste, e cila mban lidhje të ngushta me Moskën, ka argumentuar gjithashtu kundër sanksioneve të BE-së ndaj Rusisë dhe ka kërkuar të fuqizojë varësinë e Hungarisë nga karburantet fosile ruse që nga pushtimi i Ukrainës në shkurt të vitit 2022.

Ndërkohë, presidenti polak, Andrzej Duda, ka theksuar se do të nënshkruante projekt-ligjin i cili krijon një komision të fuqishëm, që gjoja synon të hetojë ndikimin rus në Poloni, por që kritikët e shohin si mjet për të hequr nga jeta politike kundërshtarët e partisë në pushtet, kryesisht liderin e opozitës, Donald Tusk.

Parlamenti e ka miratuar ligjin, i cili u propozua nga partia konservatore në pushtet Ligj dhe Drejtësi, teksa vendi po shkon drejt zgjedhjeve parlamentare në vjeshtë.

Edhe kryeministri hungarez, Viktor Orban, akuzohet për masa që vështirësojnë funksionimin e pavarur të drejtësisë dhe demokracisë.