Orban: Kërcënimi i vërtetë për Hungarinë s’është Rusia por BE-ja

Kryeministri hungarez, Viktor Orban, ka thënë në një fjalim para mbështetësve të tij të shtunën se kërcënimi i vërtetë për Hungarinë nuk është Rusia, por Bashkimi Evropian.

Ai e ka bërë këtë deklaratë ndërsa partia e tij nacionaliste po intensifikon fushatën kundër BE-së përpara zgjedhjeve kombëtare.

Me vetëm tetë javë deri në votimin e 12 prillit, Orban dhe partia e tij Fidesz po përballen me sfidën më serioze që nga rikthimi në pushtet në vitin 2010.

Shumica e sondazheve të pavarura tregojnë se Fidesz qëndron pas partisë së qendrës së djathtë Tisza dhe liderit të saj, Peter Magyar, edhe pse Orban ka bërë fushatë mbi pretendimin e pabazuar se BE-ja do t’i dërgonte hungarezët drejt vdekjes në Ukrainën fqinje nëse partia e tij humbet.

Në fjalimin e tij të së shtunës, Orban e ka krahasuar BE-në me regjimin represiv sovjetik që dominoi Hungarinë për më shumë se 40 vjet në shekullin e kaluar, dhe hodhi poshtë bindjen e shumë liderëve evropianë se presidenti rus, Vladimir Putin përbën një kërcënim për sigurinë e kontinentit.

“Duhet të mësohemi me idenë se ata që e duan lirinë nuk duhet t’i frikësohen Lindjes, por Brukselit”, ka thënë ai, duke iu referuar kryeqytetit de facto të BE-së në Belgjikë.

“Përhapja e frikës për Putinin është primitive dhe jo serioze. Brukseli, megjithatë, është një realitet i prekshëm dhe burim rreziku i afërt”, ka thënë ai. “Kjo është e vërteta e hidhur dhe ne nuk do ta tolerojmë.”

Orban ka qenë kundërshtar i madh i ndihmës ushtarake dhe financiare për Kievin që nga nisja e pushtimit në shkallë të plotë nga Rusia pothuajse katër vjet më parë, dhe ka ruajtur marrëdhënie të ngushta me Moskën. 

Në dhjetor, ai ka thënë se ishte “e paqartë kush sulmoi kë” kur dhjetëra mijëra forca ruse kaluan kufijtë e Ukrainës në shkurt 2022.

Qeveria e Hungarisë ka qenë prej kohësh në mosmarrëveshje me BE-në, e cila ka ngrirë miliarda euro fonde për Budapestin për shkak të shqetësimeve se Orban ka çmontuar institucionet demokratike, ka dobësuar pavarësinë e gjyqësorit dhe ka mbikëqyrur korrupsion të përhapur zyrtar. 

Në këmbim, Orbani ka vepruar gjithnjë e më shumë si pengues në vendimmarrjen e BE-së, duke kërcënuar rregullisht me veto ndaj politikave kyç, siç është ofrimi i mbështetjes financiare për Ukrainën.

Ndërsa zgjedhjet afrohen, ai e ka paraqitur partinë Tisza si një kukull të krijuar nga BE-ja për të rrëzuar qeverinë e tij dhe për t’u shërbyer interesave të huaja, pretendime që Tisza i ka mohuar kategorikisht.

Magyar, lideri i partisë, është zotuar të rregullojë marrëdhëniet e tensionuara të Hungarisë me aleatët e saj perëndimorë, të ringjallë ekonominë e ngecur dhe ta kthejë vendin në një rrugë më demokratike.