BE-ja thotë se ka informata të besueshme se Irani furnizoi Rusinë me dronë e raketa

Bashkimi Evropian ka bërë të ditur të enjten se i është dhënë "informacion i besueshëm" se Irani ka dorëzuar dronë dhe raketa në Rusi.

BE-ja e cilësoi veprimin si një "përshkallëzim të mëtejshëm ushtarak" si nga Rusia ashtu edhe nga Irani, raporton AP.

“Mund të them vetëm se dorëzimi i armatimit iranian qofshin dronë, por në këtë rast edhe raketa, ka shumë të ngjarë të kontribuojnë në përshkallëzimin e fushatës ushtarake ruse kundër popullit ukrainas, duke synuar më shumë qytete ukrainase, duke synuar më shumë objektiva civile në Ukrainë”, ka deklaruar zëdhënësi i Bashkimit Evropian, Peter Stano të enjten gjatë një konference për shtyp.

Sekretari amerikan i Shtetit, Antony Blinken, ka deklaruar gjatë një vizite në Londër të martën se Irani ka furnizuar Rusinë me raketa balistike.

Blinken dhe sekretari i Jashtëm britanik, David Lammy e cilësuan veprimin si një “përshkallëzim të rrezikshëm”.

Menjehërë pas deklaratave të Blinkenit dhe Lammyt, Britania, Franca dhe Gjermania i vendosen sanksione Iranit. Të njëjtin veprim më pas e ndërmori edhe SHBA-ja.