Autoritetet në Bahrejn kanë arrestuar 41 persona të dyshuar për lidhje me trupat e Gardës Revolucionare Islamike, ka njoftuar Ministria e Brendshme e vendit.
Sipas autoriteteve, operacioni është realizuar pas hetimeve të shërbimeve të sigurisë dhe prokurorisë, të cilat lidhen me raste të dyshuara të spiunazhit dhe ndërhyrjes së huaj.
Ministria e Brendshme ka bërë të ditur se procedurat ligjore ndaj të arrestuarve janë duke vazhduar, ndërsa kontrollet dhe hetimet janë zgjeruar për të identifikuar persona të tjerë të përfshirë në aktivitete të paligjshme ose të lidhura me këtë organizatë.
Autoritetet e Bahrejnit kanë thënë se edhe në të kaluarën kanë arrestuar persona të dyshuar për lidhje me Gardën Revolucionare, në një kontekst tensionesh të rritura rajonale.
Ngjarja vjen në një periudhë të ndjeshme në rajon, të shoqëruar me përshkallëzime mes Iranit dhe aleatëve të SHBA-së dhe Izraelit në Gjirin Persik.
