Afro 1 milion kërkesa për azil brenda BE-së vetëm gjatë vitit 2022

Rreth 1 milion njerëz kanë aplikuar për mbrojtje ndërkombëtare brenda Bashkimit Evropian në vitin 2022, thonë të dhënat e publikuara të mërkurën.

Numri i azilkërkuesve, sipas këtyre të dhënave ka arritur në një nivel të paparë që nga kriza e refugjatëve e viteve 2015-2016, raportoi Associated Press të mërkurën.

Agjencia e BE-së për azilin ka bërë të ditur se 966,000 aplikacione për azil janë bërë në 27 vende të BE-së e po ashtu në Norvegji dhe Zvicër vetëm vitin e kaluar, apo 50 për qind më shumë se në vitin 2021.

Këtu nuk përfshihen më shumë se 4 milionë refugjatë ukrainas të cilëve u është garantuar mbrojtje e përkohshme brenda BE-së, një mekanizëm i posaçëm i aktivizuar për të shmangur kolapsin e sistemeve të azilit tashmë të ngecura.

Agjencia evropiane e lidhi rritjen e kërkesave me lehtësimin e vazhdueshëm të kufizimeve të udhëtimit COVID-19, rritjen e pasigurisë ushqimore dhe konfliktet në shumë pjesë të botës. Megjithëse shumica e azilkërkuesve hyjnë legalisht në BE, kryesisht me avion me viza udhëtimi, disa kaluan gjithashtu kufijtë tokësorë dhe detarë të BE-së pa leje, kryesisht përmes Ballkanit Perëndimor dhe Mesdheut.

Pas më shumë se një dekade lufte dhe kolapsi ekonomik në vendin e tyre, sirianët vazhduan të jenë kombësia kryesore e azilkërkuesve në Evropë me më shumë se 130,000 aplikime. Ata u ndoqën nga afër nga afganët që iknin nga problemet spirale të sigurisë, humanitare dhe financiare që pasuan pushtimin e talebanëve në gusht 2021, me 129,000 kërkesa.