Rusia akuzon administratën Biden për krijimin e atmosferës për sulm ndaj Trumpit

Zyrtarë të Kremlinit kanë thënë të dielën se nuk besojnë se administrata amerikane ishte përgjegjëse për atentatin e së shtunës ndaj kandidatit për president të SHBA-së, Donald Trump, por se ajo kishte krijuar një atmosferë që provokoi sulmin.

Trumpi u qëllua në vesh gjatë një mitingu në Pensilvani, në një sulm që tani po hetohet si një atentat.

Sulmuesi u qëllua për vdekje dhe zyrtarët e zbatimit të ligjit thanë se nuk kishin identifikuar ende një motiv, raporton Reuters.

“Ne nuk besojmë se përpjekja për të eliminuar dhe vrarë Trumpin është organizuar nga autoritetet aktuale”, u ka thënë gazetarëve zëdhënësi i Kremlinit, Dmitry Peskov.

"Por atmosfera rreth kandidatit Trump... provokoi atë me të cilën Amerika po përballet sot”, ka shtuar ao.
Presidenti i SHBA-së Joe Biden e dënoi sulmin, duke thënë se nuk kishte vend për këtë lloj dhune në Amerikë. Peskov ka thënë ndërkaq se Rusia dënon çdo dhunë në rrjedhën e luftës politike.

Komentet e tij u bënë jehonë atyre të disa prej aleatëve republikanë të Trumpit, të cilët menjëherë ia hodhën fajin Bidenit.

“Pas përpjekjeve të shumta për të hequr kandidatin Trump nga arena politike – duke përdorur mjetet e para ligjore, gjykatat, prokurorët, përpjekjet për ta diskredituar politikisht dhe kompromentuar kandidatin, ishte e qartë për të gjithë vëzhguesit e jashtëm se jeta e tij ishte në rrezik”, ka thënë Peskov.

Udhëheqësit botërorë, përfshirë presidentin ukrainas, Volodymyr Zelensky, dënuan me shpejtësi sulmin e së shtunës, duke shprehur tronditje, duke denoncuar dhunën politike dhe duke i uruar Trumpit një shërim të shpejtë.

Ministria e Jashtme e Rusisë shfrytëzoi rastin për t'i kërkuar Washingtonit të ndalojë financimin e ushtrisë së Ukrainës dhe të përqendrohet në përmirësimin e zbatimit të ligjit vendas.