Të paktën tetë të vrarë nga sulmet ruse në Ukrainë

Prokurorët ukrainas kanë njoftuar të mërkurën se të paktën 8 civilë kanë humbur jetën si pasojë e sulmeve me dronë dhe raketa të Rusisë në rajonin lindor të Donjetskut, ka raportuar AFP.

Konfirmimi është bërë pak kohë pasi Kremlini zyrtar ka hedhur poshtë kritikat e presidentit amerikan, Donald Trump, për homologun e tij rus, Vladimir Putin, tek ka thënë se “jemi të qetë sa i përket kësaj”.

“Le të themi se Trumpi në përgjithësi ka një stil shumë të ashpër retorik në kuptimin e frazave të cilat i përdorë”, ka deklaruar zëdhënësi i Kremlinit, Dmitry Peskov.

Sipas tij, presidenti amerikan e ka kuptuar më në fund se konflikti mes Rusisë dhe Ukrainës nuk është aq i lehtë për t’u zgjidhur.

“Kemi dëgjuar gjithashtu një deklaratë shumë të rëndësishme nga Trumpi se zgjidhja e konfliktit në Ukrainë ka rezultuar të jetë më e vështirë sesa ai e kishte paramenduar në fillim”, ka shtuar Peskov.