Qendra e Detroit Pistonsit, Isaiah Stewart, është dënuar me shtatë ndeshje nga NBA-ja të mërkurën, ndërsa janë dënuar edhe tre basketbollistë të tjerë.
Dënimet për basketbollistët kanë ardhur pas përleshjes së madhe që ndodhi në ndeshjen mes Pistonsit dhe Charlotte Hornetsit.
Basketbollistët e Hornetsit, Miles Bridges dhe Moussa Diabate, u suspenduan me nga katër ndeshje për përleshje dhe përshkallëzim të situatës, ndërsa qendra e Pistonsit, Jalen Duren, u dënua me dy ndeshje, ka njoftuar NBA-ja.
Ky ballafaqim u zhvillua të hënën pas mesnate.
Ndeshjen e fitoi Pistonsi 110:104.
Stewart ishte dënuar me pesë ndeshje edhe në vitin 2021, pas një incidenti që kishte me LeBron Jamesin.
