Fordi ka bërë të ditur se do t’i tërheqë 634,000 vetura nga tregu në të gjithë botën për shkak të rreziqeve të zjarrit nga injektorët e karburantit.
Prodhuesi i dytë më i madh i automjeteve amerikane, sipas shitjeve, ka thënë se tërheqja mbulon SUV-të e modelit të viteve 2020-2023 Bronco Sport dhe Escape me 3 cilindra dhe me motorë 1.5 litra, raportoi Reuters të enjten.
Automjetet e riparuara sipas tërheqjes së mëparshme do të kenë ende nevojë për rregullimin e ri, bëri të ditur Administrata Kombëtare e Sigurisë së Trafikut në Autostrada.
Fordi ka thënë se një injektor i plasaritur karburanti mund të shkaktojë grumbullimin e karburantit ose avullit të karburantit pranë sipërfaqeve të nxehta, duke rezultuar potencialisht në zjarr.
Tërheqja sipas kompanisë, përfshin 520,000 vetura në SHBA dhe rreth 114,000 në shtetet e tjera.
Kompania po ashtu ka bërë të ditur se ka pasur 54 raporte për zjarr, mirëpo nuk ka pasur ndonjë rast të vdekjes si pasojë e problemit.
