Kryenegociatori i Kosovës për Bashkimin Evropian, Jeton Zulfaj, ka thënë se ky post që e mban është sinjal që Kosova është e gatshme për të hapur negociatat me Bashkimin Evropian.
Zulfaj në emisionin “Interaktiv” në KTV, ka deklaruar se Kosova përveç se të marrë statusin kandidat është e gatshme edhe për hapje të negociatave.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo“Mendoj se është edhe sinjal që po kalon Kosova në procesin e zgjerimit. Ne jemi të gatshëm për hapjen e negociatave me Bashkimin Evropian. Përveç se jemi gati për marrjen e statusit kandidat i cili nuk duhet të jetë larg vendimit për hapjen e negociatave, sepse tashmë të gjitha vendet e Ballkanit Perëndimor kanë avancuar në këtë proces dhe kanë vendim për hapjen e negociatave. Dy prej tyre janë më përpara në këtë proces, Shqipëria dhe Mali i Zi”, ka thënë Zulfaj.
Zulfaj ka shtuar se as vetë Bashkimi Evropian, nuk e mohon që “Kosova nuk ka ndonjë kriter për të plotësuar për të marrë statusin kandidat”.
Në kuadër të shënimit të Ditës së Evropës që mbahet në javën e parë të majit, ushtruesja e detyrës së shefes së Zyrës së BE-së në Kosovë, Eva Palatova, ka deklaruar se Kosova nuk mund ta marrë automatikisht statusin e kandidatit për anëtarësim në Bashkimin Evropian, duke theksuar se vendi duhet t’i bindë të 27 shtetet anëtare të BE-së.
Palatova theksoi se Kosova duhet të vazhdojë të dëshmojë standarde demokratike dhe stabilitet institucional.