VV-ja dorëzon kallëzim penal ndaj Komunës së Prishtinës për objektin e LDK-së

Lëvizja Vetëvendosje ka dorëzuar kallëzim penal të martën në Prokurorinë Themelore për Drejtorinë e Inspekcionit të Prishtinës, për siç pretendojnë ata, mosndërhyrjen në objektin pa leje të Lidhjes Demokratike të Kosovës në kryeqytet.

Sipas VV-së, Drejtoria e Urbanizmit ia kishte refuzuar lejen LDK-së, siç edhe e kishin prezantuar përmes një konference të jashtëzakonshme më 6 prill, por pavarësisht kësaj, ata kanë ndërhyrë në objekt – që është edhe selia kryesore e partisë.

“Ne, në konferencë paralajmëruam që jemi duke e përgatitur një kallëzim penal. Dy javë më vonë, ndonëse shpresuam se Drejtoria e Inspekcionit do të marrë masa, një gjë e tillë nuk ndodhi, prandaj edhe sot deponuam këtë kallëzim penal. Presim nga organet e drejtësisë që të marrin masa ndaj atyre që e keqpërdoren detyrën zyrtare duke toleruar ndërtime pa leje në qendër të qytetit. Dhe, ftojmë LDK-në që të tërhiqet nga kjo traditë e saj, sepse po e ngulfat kryeqytetin”, thuhet në njoftimin e VV-së në Facebook.