Vonesat në asfaltim të rrugës “Robert Doll” në Prishtinë detyrojnë banorët të protestojnë

Zgjatja e punimeve për asfaltimin e rrugës “Robert Doll” në Prishtinë, ka detyruar banorët e lagjes “Pejton” të dalin në protestë.

Ata tentuan të martën që ta bllokojnë qarkullimin e automjeteve në këtë rrugë, por pas diskutimeve me Policinë, u tërhoqën, raporton KTV.

Me këtë protestë ata u ankuan se gjatë kohës së punimeve po përballen me sasi të mëdha pluhuri.

Komuna ka planifikuar që rruga të asfaltohej javën e kaluar, mirëpo sipas drejtorit për Investime Kapitale, kjo është vonuar për shkak të ndërrimit të gypit të ujësjellësit të vjetër mbi 50 vjet.

Me kërkesë të komunës, Kompania Rajonale e Ujësjellësit “Prishtina”, ka nisur punimet për ndërrimin e gypit.

Si pasojë e punimeve, që nga e mërkura, një pjesë e madhe e lagjes “Dardania” ka mbetur pa ujë nga ora nëntë deri në 17 pasdite.

Ndërkohë, komuna ka nisur rregullimin e disa rrugëve, por pak prej tyre janë përfunduar.

Edhe Arbëri 27 tet 2025 Mbyllet sonte për qarkullim rruga “Robert Doll” në Prishtinë

Rruga “Ukshin Hoti”, sipas komunës, nuk po mund të asfaltohet derisa të jetë e gatshme rruga me të cilën lidhet, ajo “Robert Doll”.

Me vonesë punimet kanë nisur edhe në rrugën “Mikel Marubi” në lagjen Vneshta.

Ndërsa, nuk ka vazhduar ende asfaltimi i rrugës “Holgen Petersen”, ku komuna i ndërpreu punimet për shkak të mosrespektimit të kontratës nga ana e kompanisë.