Vërshimet pamundësojnë procesin mësimor në disa institucione në Istog

Për shkak të situatës së krijuar nga vërshimet, katër institucione arsimore në Istog nuk do të zhvillojnë procesin mësimor të hënën.

Drejtori i Drejtorisë për Arsim, Naim Behlulaj, i tha KOHËS të dielën se Gjimnazi “Haxhi Zeka”, Shkolla Fillore “Bajrami Curri”, çerdhja “Gëzimi Ynë” dhe Shkolla Fillore e Mesme e Ulët “Ndre Mjeda”, në fshatin Rakosh, nuk do të mbajnë mësim.

Ai i tha KOHËS se sasia e madhe e ujit e ka pamundësuar lëvizjen në këto institucione, derisa shtoi se ekipet e nevojshme janë në terren.

Nga Drejtoria për Shërbime Publike i kanë thënë KOHËS gjatë ditës se disa shtëpi janë dëmtuar nga vërshimet, ndërsa disa rrugë kanë qenë të bllokuara. Gjendja është konsideruar alarmante.