Osmani e quan Vulinin dëmtues dhe kërcënues të paqes

Presidentja e Kosovës, Vjosa Osmani, e ka quajtur dëmtues të demokracisë dhe kërcënues të paqes Aleksandar Vulinin, derisa përshëndeti vendimin e Shteteve të Bashkuara të Amerikës që të hënën e sanksionuan atë.

Osmani shkroi në Twitter se drejtori i Agjencisë për Siguri dhe Informacion të Serbisë (BIA) u shërbeu interesave të Rusisë e të krimit të organizuar, duke minuar stabilitetin rajonal.

“Vulini dëmtoi demokracinë dhe kërcënoi paqen në rajonin tonë. Ai u shërbeu interesave malinje të Rusisë dhe krimet të organizuar transnacional, duke minuar kështu stabilitetin. Përshëndes SHBA-në për vendimin për ta sanksionuar atë. Së bashku me aleatët tanë do të luftojmë ndikimin e akterëve të tillë keqdashës”, tha Osmani.

Paraprakisht kishte reaguar shefi i Presidencës, Blerim Vela, duke thënë se SHBA-ja po i mban përgjegjës “ata që e çojnë më tej agjendën e tyre politik në dëm të paqes në Ballkanin Perëndimor”, si dhe ata që po i vazhdojnë “aktivitetet keqdashëse të Rusisë në Serbi dhe rajon”.

Siç është bërë e ditur të martën nga Departamenti i Thesarit të Shteteve të Bashkuara, sanksionet janë vendosur pasi Vulini është përshirë në afera korruptive.

Më tej thuhet se këto afera korruptive çojnë përpara agjendat e tij politike dhe interesat personalen në kurriz të paqes dhe stabilitetit në Ballkanin Perëndimor.