Sijarina: Të legalizohet spreji vetëmbrojtës për gratë

Liridona Sijarina nga Grupi Kolektiv Feminist, deklaroi të hënën se grave duhet t’iu lejohet përdorimi i sprejit, që të mbrohen kur përballen me dhunues.

Ajo deklaroi në Interaktiv të KTV-së se kërkojnë nga institucionet që pos legalizimit të sprejit, të merren më seriozisht me rastet e dhunës me bazë gjinore, ato të pedofilisë dhe kryesit e veprës të marrin dënimin meritor.

“Thirrja kryesore është legalizimi i sprejave mbrojtës për gratë. Në disa vende janë të lejueshme sepse janë mbrojtës kur jemi në rrezik. Nëse një gruaje tani i gjendet një sprej, mund të ndiqet edhe sipas Kodit Penal. E shohim si momentum që grave t’iu lejohen armë vetëmbrojtëse”, deklaroi Sijarina.

Ajo theksoi se nuk janë të nevojshme reagimet dhe “vajtimet” e politikanëve, pasi siç u shpreh ajo, politikanët e kanë për mandat t’i mbrojnë qytetarët.

"Nuk na duhen vajtimet e politikanëve, e kanë me mandat dhe paguhen të na mbrojnë. Nuk kemi nevojë të na tregojnë sa e keqe është gjendja e grave. Vajtimet koti në Facebook janë disa elegji që gratë nuk kanë nevojë. Derisa gratë ndihen të rrezikuara, neve na duhen hapa konkretë”, deklaroi Sijarina.

Edhe Arbëri 14 tet 2022 Gratë kërkojnë legalizimin e sprejit për vetëmbrojtje

Për Sijarinën, problematik është edhe zinxhiri i institucioneve, që siç u shpreh ajo, mendësia patriarkale e pezullon reagimin e shpejt të drejtësisë.

“Institucionet tona kanë probleme në mbajtjen e arkivave dhe rasteve, sidomos kur janë për dhunë ndaj grave. Nuk mund të japim konkluzion që dhuna po rritet, por është e pranishme. I kemi një sërë institucionesh të kalbura. Shumica e rasteve nuk e marrin trajtimin e duhur. Nuk trajtohen me rëndësinë që duhet, por neglizhohen. Rastet me dhunë në bazë gjinore marrin dënime nën atë që lejohet”, shtoi ajo.