Organizatat e shoqërive civile në Serbi i kanë bërë thirrje Bashkimit Evropian që të ndalojë marrëveshjet me liderët autokratë, duke iu referuar presidentit Aleksandar Vuçiq. Shoqëria civile serbe ka thënë se BE-ja duhet të mbështesë politikanët demokratikë në Serbi dhe t’u japë atyre mbështetje për angazhim në dialogun mes Prishtinës dhe Beogradit. Ndryshe, sipas tyre, mosmarrëveshjet në rajon do të mbesin të pazgjidhura.
Sipas tyre, është evidente që politika e pajtimit dhe bashkëpunimit me regjimin aktual në Serbi nuk do të japë fryte.
“Sot është bërë evidente se politika e pajtimit dhe bashkëpunimit me regjimin në Serbi nuk do të japë fryte. Për këto arsye, i bëjmë thirrje Bashkimit Evropian, shteteve të tij anëtare dhe partnerëve të tjerë perëndimorë që të ndryshojnë politikën aktuale të arritjes së marrëveshjeve të dyshimta me liderët autokratë. Siguroni vazhdimin e negociatave për normalizimin e marrëdhënieve ndërmjet Beogradit dhe Prishtinës, angazhohuni urgjentisht në një dialog të strukturuar me aktorët pro-demokratikë dhe pro-BE në vend dhe rajon”, thuhet në një apel të shumë organizatave të shoqërisë civile serbe pak ditë pas Konferencës së Sigurisë në Beograd (BSC).
Organizatat e shoqërisë civile u bënë thirrje ndërkombëtarëve që të përmbahen nga vendosja e sanksioneve të përgjithshme ekonomike ose të tjera që do të preknin popullatën serbe dhe “të mbështesin përpjekjet për të siguruar kushte të drejta dhe të lira në zgjedhjet e përgjithshme të dhjetorit në Serbi”.
Ata thonë se Serbia dhe Ballkani Perëndimor janë sërish në një udhëkryq, duke shtuar se ka ardhur koha ose për të arritur paqen dhe prosperitetin afatgjatë përmes procesit të integrimit në BE, ose për t’u zhytur sërish në një spirale vdekjeprurëse autokracie dhe konflikti.
Edhe
Politikanët perëndimorë letër BE-së e SHBA-së, kërkojnë qasje më të ashpër ndaj Serbisë
“Normalizimi i marrëdhënieve ndërmjet Beogradit dhe Prishtinës dhe zgjidhja e të gjitha mosmarrëveshjeve në rajon nuk do të jetë e mundur pa shkëputjen e shtetit dhe vendosjen e demokracisë në Serbi”, theksohet në apel.
Shtohet se shtetasve serbë u është hequr qasja në media të lira dhe të pavarura.
“Përmes një veprimi të bashkërenduar të mediave nën kontrollin e drejtpërdrejtë të regjimit në pushtet, ata janë ekspozuar ndaj një propagande të vazhdueshme antiperëndimore dhe të tjera populiste, që ka qenë në kundërshtim të plotë me angazhimin e deklaruar të qeverisë për anëtarësimin e vendit në BE. Prandaj, mbështetja e qytetarëve për anëtarësimin e Serbisë në BE është në nivelin më të ulët në dhjetë vjetët e fundit, ndërsa mbi 65% e qytetarëve e shohin Rusinë si mikun më të madh të vendit”, nënvizojnë organizatat e shoqërisë civile.
Sipas tyre, duke minuar rendin kushtetues të Serbisë dhe ndarjen e pushteteve të vendosura prej saj, Vuçiqi uzurpoi kompetencat e qeverisë, Asamblesë Kombëtare dhe madje edhe të gjyqësorit.
“Nacionalizmi, korrupsioni dhe krimi i organizuar ndërkufitar kanë qenë në rritje të vazhdueshme. Marrëdhëniet rajonale janë acaruar, çështja e Kosovës ka hyrë në një ngërç dhe orientimi i politikës së jashtme të Serbisë është i ndarë mes një mimike të integrimit në BE dhe lidhjeve të ngushta me Rusinë”.
Edhe
BE rreth deklaratave të Vuçiqit: Të evitohen deklaratat që nuk ndihmojnë normalizimin
Shoqëria civile serbe vlerëson se sulmi terrorist në Banjskë më 24 shtator, ku u vra rreshteri Afrim Bunjaku, dhe reagimet nga Beogradi që pasuan kanë zbuluar se regjimi në pushtet rrallëherë udhëhiqet nga përkushtimi bazë për vlerat dhe mbrojtjen e të drejtave të qytetarëve, por nga opinioni populist.
“Duke mbështetur njerëzit e lidhur me krimin e organizuar, të cilët janë nën sanksionet e SHBA-së, dhe duke i shpallur ata si mbrojtës të interesave serbe në Kosovë, regjimi i Serbisë ndërton struktura destabilizuese në Kosovë, duke pretenduar të jetë një partner konstruktiv në dialog. Politika, narrativat dhe veprimet e saj dhjetëvjeçare kanë krijuar hapësirë për ngjarjet e fundit tragjike, duke kërcënuar kështu sigurinë e të gjithë rajonit”, shtohet në apel.
