Në mbledhjen e radhës së Kuvendit Komunal të Prishtinës sërish ka pasur përplasje mes asamblistëve të koalicionit qeverisës në kryeqytet dhe atyre të opozitës.
Pas debateve dhe akuzave mes tyre, në lidhje me Ndërmarrjen Publike Banesore, asamblistët e partive të pozitës kanë lëshuar mbledhjen. Ata dolën nga salla në shenjë kundërshtimi të kërkesës që bënë asamblistët e Vetëvendosjes për shkarkimin e aksionarëve të NPB-së, që janë asamblistë të PSD-së, raporton Koha Ditore.
Asamblisti i VV-së, Egzon Azemi, ka thënë se rreth NPB-së po tregohet hipokrizi “ndërsa ai u shkarkua për t’i hapur rrugë keqpërdorimeve në ndërmarrje”.
Në anën tjetër, Dren Kukaj, drejtor i Pronës në Komunë dhe aksionar në NPB i zgjedhur nga kryetari Shpend Ahmeti, i është drejtuar Azemit me fjalët se duhet të ketë kujdes çfarë flet, përndryshe do të ngrejë padi për shpifje.
