-
Nga:
Ilir Osmanaj
- 6 shkurt 2021 21:31
- Shpërndaje në:
Dëmtime të rënda ka pësuar gjatë dimrit rruga e Rugovës.
Në tërë gjatësinë e saj, nga Peja e deri në Kuqishtë, ajo përshkohet nga gropat, derisa asfalti është plasaritur tërësisht. Problem të madh për sigurinë paraqesin edhe rrëshqitjet e gurëve dhe dheut.
Gjendja e kësaj rruge po përkeqësohet nga viti në vit. E asfaltuar në vitin 2004, në të më nuk është investuar, me përjashtim të mirëmbajtjes.
Të vazhdueshme kanë qenë ankesat e banorëve të kësaj treve. Për ta, prioritet përherë ka qenë rindërtimi dhe zgjerimi i kësaj rruge.
Për nevojën e rindërtimit të rrugës së Rugovës, në të cilën numri i vizitorëve po shumëfishohet për çdo vit, Komuna e Pejës, siç thotë nënkryetari Fatmir Asllani, i është drejtuar Ministrisë së Infrastrukturës, e cila është kompetente për të.
Edhe
Banorët kërkojnë rindërtimin e plotë të rrugës së Rugovës
“Shpresojmë që këtë vit do të gjejë Ministria mundësi që ta bëjë zgjerimin e saj,
sepse kjo është jetike për zonën e Rugovës”, ka thënë Fatmir Asllani, nënkryetari i Komunës së Pejës.
KOHA ka kontaktuar drejtorin e Departamentit për Menaxhimin e Rrugëve në Ministrinë e Infrastrukturës, Malë Lokaj.
Lokaj e sheh të nevojshëm një investim kapital milionësh, pasi, sipas tij, ajo rrugë nuk mund të përmirësohet veç me mirëmbajtje.
Edhe
Rugovasit kërkojnë rindërtimin e rrugës Pejë-Kuqishtë
“Aty duhet të ndërhyhet krejt në infrastrukturë. Me mure, me lëshesa, me çka të jetë e nevojshme. Por, duhet investim kapital. Se është një gjatësi, është konfiguracioni i tillë, është ashtu”, ka deklaruar Malë Lokaj, drejtor i Departamentit të Menaxhimit të Rrugëve në MI.
Se a ekziston në planet e saj për sivjet rindërtimi i kësaj rruge, KOHA i është drejtuar Ministrisë së Infrastrukturës, por nuk ka marrë përgjigje deri në momentin e raportimit.
