Rrethi me flamur bëhet me trotuar të papërshtatshëm për ecje

Të gjithë që kalojnë kah rrethi me flamur bëjnë kujdes të shtuar kur ecin. Disa edhe po pengohen nga kalldrëmi i shtuar.

Trotuaret këtu kanë qenë të shtruara me kubëza, por ato po zëvendësohen me kalldrëm, i cili nuk është vendosur si duhet.

“Po na paraqet vështirësi në të ecur, sepse nëse rrëzohem mund edhe të lëndohem në këtë trotuar, sepse unë jam edhe i moshuar. Mirëpo, ne nuk kemi çfarë të bëjmë, ata që e kanë filluar në këtë mënyrë punimet e dinë, unë nuk e di. As nuk po më pëlqen e kanë lënë një pjesë ndryshe pjesën tjetër ndryshe”, ka thënë qytetari Isuf Isufi.

Drejtori i Shërbimeve Publike, Ilirik Musliu, e ka pranuar që punimet nuk janë zhvilluar në formën e duhur. Duke shtuar se janë duke u bërë përmirësime dhe se trotuari që është duke u shtruar do të përdoret vetëm për dekorim dhe jo për kalim të këmbësoreve.

“Është e vërtetë që tani jo në formën më të mirë të mundshme po bëhet kalimi i këmbësorëve në këtë pjesë. Mirëpo, po besoj që shumë shpejt shtrohet edhe shiriti tjetër që është komplet për lëvizshmëri. Në konsultim me inxhinierët e ndërtimit dhe komunikacionit është planifikuar një projekt i tillë, momentin që janë inspektuar dhe është bërë kontrolli, punimet nuk janë pranuar. Brenda shtatë ditësh do të bëhen rregullimet, në momentin që nuk pranohen prapë përmirësimet që jemi duke i bërë tani duhet të intervenohet deri të vijmë deri te kualiteti i mirë. Ka mundësi që të ketë edhe penalitete pastaj”, ka thënë ai.

“Këto janë pjesa e parë e punimeve, po flasim për këtë trotuarin që po shihet e i cili është i shtruar me kalldrëm natyral, as i fabrikuar as i përpunuar por është natyral. Por i cili nuk do të shfrytëzohet për kalim të njerëzve. Pjesa tjetër në një hapësirë prej dy metrave do të shtrohet me pllakën e njëjtë të formatit me të cilin kemi punuar te parku. Në të njëjtën kohë do të vendoset edhe një rrethojë këtu, dhe e fundit që do të implementohet do të jetë sinjalistika dhe shenjëzimi për arsye të aksidenteve”, ka shtuar Musliu.

Edhe Arbëri 1 nën 2026 Trotuaret në Fushë-Kosovë mbushen me vetura, këmbësorët detyrohen të ecin në asfalt

Fajtorë që puna nuk po bëhet mirë, sipas opozitës është Komuna dhe organi mbikëqyrës.

“Siç po shihet, ideja ka qenë e mirë, mirëpo puna nuk është duke u bërë në mënyrën e duhur. Duke e pasur parasysh që ky vend ka shumë qarkullim, unë mendoj që duhet këtu patjetër që të intervenohet dhe të sanohen problemet. Ndoshta është një metodë e tyre që punimet të kryhen shpejt dhe po i lënë në këto formë të keqe. Këtu fajtori është organi mbikëqyrës dhe komuna që e kanë pranuar teknikisht në këtë mënyrë, sepse kjo nuk ka kuptim. Të gjitha skajoret janë keq, pusetat janë keq gjithçka është e punuar në mënyrë jo të rregullt”, ka thënë asamblisti i AAK-së, Bahri Gashi.

Punimet për shtrimin me kalldrëm të asaj pjese ka filluar qe një javë kurse i gjithë projekti sipas Komunës pritet të përfundojë në 90 ditë pune.