Kryeministri i Shqipërisë, Edi Rama, pasi ka pritur kryeministrin në detyrë të Kosovës, Albin Kurti, në samitin për Planin e Rritjes të Bashkimit Evropian, është pyetur nga gazetarët për raportet mes tyre.
Ai nuk është përgjigjur por ka përmendur një telenovelë me mbi 1000 episode duke thënë se thënë se po të përgjigjet përfundon telenovela.
“A e do a se do, a të do a s’të do. 1 mijë episode si është ajo ‘Vitrinat’. Po të këtë përgjigje nuk vazhdon telenovela”, u ka thënë Rama gazetarëve.
Përplasjet Kurti-Rama kanë një historik të gjatë. Kanë nisur të theksohen në kohën kur është plasuar ideja e Ballkanit të Hapur, nismë që Shqipëria e ka përqafuar e Kosova e ka refuzuar, pastaj kanë vazhduar me pjesëmarrjen e Vetëvendosjes në zgjedhjet në Shqipëri e kanë kulmuar me anulimin e mbledhjes së dy qeverive nga Tirana zyrtare, që është vlerësuar edhe si sanksion ndaj Kosovës për zhvillimet në veri gjatë vitit 2023. Në të njëjtën kohë sanksione ka vënë edhe Bashkimi Evropian dhe ato janë ende në fuqi.