-
Nga:
Valbona Bytyqi
- 10 janar 2024 20:08
- Shpërndaje në:
Drejt fundit është afati prej 30 ditësh për mbledhjen e nënshkrimeve, përmes të cilave do të shkarkoheshin katër kryetarët e komunave në veri, të banuara kryesisht me serbë. Por, përveç rrjedhjes së afatit, në Qeveri nuk kanë dhënë informacione nëse ka nisur mbledhja e nënshkrimeve.
Dy deri në tri javë kohë u kanë mbetur qytetarëve serbë që të nënshkruajnë peticionin për shkarkimin e kryetarëve në katër komunat në veri.
Në Mitrovicë të Veriut, Leposaviq e Zubin Potok, iniciuesit e peticionit kanë kohë deri më 22 janar të mbledhin nënshkrimet e nevojshme, e në Zveçan edhe pesë ditë më shumë.
Ministri i Administrimit të Pushtetit Lokal, Elbert Krasniqi, në një konferencë për media pas mbledhjes së Qeverisë, përveç që ka folur për rrjedhjen e afatit, nuk ka treguar nëse ka nisur mbledhja e nënshkrimeve.
Krasniqi tha se me krijimin e kushteve ligjore për peticion, Kosova ka përmbushur kushtet e kërkuara nga BE-ja për heqjen e masave ndëshkuese.
“Si Kosovë kemi ndërmarrë të gjitha veprimet për të përmbushur obligimet tona. Udhëzimi administrativ është hapi konkret i cili na mundëson për të shkuar në zgjedhje të parakohshme në veri të vendit duke pasur parasysh veprimet ligjore dhe demokratike”, ka deklaruar Krasniqi.
E reagim më të ashpër të ndërkombëtarëve karshi Serbisë ka kërkuar ministrja e Drejtësisë, Albulena Haxhiu.
Duke folur për qytetarët e Kosovës që janë duke u mbajtur në paraburgim në Serbi, Haxhiu tha se është hasur në neglizhencë nga autoritetet serbe për trajtimin e rasteve të tyre.
“Edhe përkundër faktit që ne me vullnet do t’i kryejmë përgjegjësitë tona nuk presin reflektim nga ana e Serbisë, por këtu thërras që partnerët ndërkombëtarë duhet të bëjnë shumë më shumë presion ndaj Serbisë dhe të mos i injorojnë veprimet e tilla që Serbia po i bën në vazhdimësi”, ka thënë Haxhiu.
Rasti i fundit i arrestimeve në Serbi, është ai i ish-pjesëtarit të UÇK-së, Hasan Dakaj, të cilit autoritetet i kanë caktuar masën e paraburgimit prej një muaji.
