PSD-ja paralajmëroi padi pasi u gjobit me 20 mijë euro, AIP-i thotë se ka shqiptuar 9 gjoba

Agjencia për Informim dhe Privatësi (AIP) ka bërë të ditur se nga qershori i vitit 2021, kur edhe është funksionalizuar, ka shqiptuar gjithsej nëntë gjoba, prej të cilave katër ndaj institucioneve publike e pesë ndaj institucioneve private.

Në një komunikatë për media të AIP-it, të lëshuar të martën, në ditën kur Partia Socialdemokrate ka paralajmëruar se do të dorëzojë padi ndaj AIP-it, për shkak se kjo e gjobiti me 20 mijë euro “për përpunim të kundërligjshëm të të dhënave personale”.

Kjo gjobë është shqiptuar për rastin ku kjo parti në oborrin e Qeverisë shpalosi peticionin e vitit 2015 kundër Asociacionit të komunave me shumicë serbe, me 205 mijë nënshkrime të qytetarëve.

Në komunikatën thuhet se AIP-i është institucion i pavarur që i përgjigjet Kuvendit dhe ka mandat mbikëqyrjen e zbatimit të Ligjit për Mbrojtjen e të Dhënave Personale dhe Ligjit për Qasje në Dokumente Publike.

“Agjencia është e autorizuar të shqiptoj gjoba për institucione publike e private kur ato shkelin këto dy ligje. Për shkeljen e dispozitave të Ligjit për Mbrojtjen e të Dhënave Personale, Agjencia që nga funksionalizimi i saj (qershor 2021) ka shqiptuar gjobë ndaj katër institucioneve publike (ATK, Agjencinë e Bujqësisë, Komunën e Podujevës dhe Trepçën) dhe pesë institucioneve private për përpunim të paligjshëm të të dhënave personale”, thuhet në komunikatë.

Sipas tyre përpunim i të dhënave personale në kuptim të Ligjit për mbrojtjen e të dhënave personale, është edhe publikimi. “Publikimi i numrit të madh të të dhënave personale është shkelje e rëndë dhe sipas ligjit, dënohet me gjobë. Gjoba minimale për publikim të të dhënave personale në kundërshtim me kriteret ligjore është 20 mijë euro”, thuhet në komunikatë.

Edhe Arbëri 18 pri 2023 PSD-ja padit AIP-in, kundërshton gjobën prej 20 mijë eurosh

Agjencia thuhet se do të vazhdojë mbikëqyrjen e Ligjit për Mbrojtjen e të Dhënave Personale dhe Ligjit për Qasje në Dokumente Publike, siç theksohet, duke mbrojtur privatësinë e qytetarëve dhe lirinë e informimit të tyre dhe do të marrë masa çdo herë që do të ketë shkelje ndaj këtyre dy të drejtave kushtetuese dhe ligjore.