Prokuroria Themelore në Prishtinë ka refuzuar të tregojë se kush është prokuror në rastin i cili është iniciuar kundër ministrit në detyrë të Tregtisë dhe Industrisë, Endrit Shala, i cili sulmoi fizikisht një gazetar.
Koha.net ka kontaktuar me zëdhënësen e Prokurorisë Themelore në Prishtinë, Laureta Ulaj për të marrë emrin e prokurorit të rastit, por e njëjta ka thënë se një gjë e tillë iu është ndaluar.
“Na është ndaluar të tregojmë emrin e prokurorit të rastit. Më vjen keq por nuk mund t’ua jap këtë informatë”, ka thënë ajo.
Ulaj tutje ka shtuar se rasti po vazhdon të hetohet dhe të trajtohet si ‘sulm’.
“Palët e përfshira në rast kanë dhënë deklaratat e tyre në Polici dhe tash rasti vazhdon në Prokurori në bashkëpunim me Policinë për grumbullimin e informatave dhe provave të tjera të cilat shërbejnë për rastin”, ka thënë tutje ajo.
Edhe
Intervistohet Endrit Shala për sulmin ndaj gazetarit
Ministri në detyrë, Endrit Shala, më 17 dhjetor ka goditur fizikisht gazetarin Ensar Ramadani të portalit Indeksonline në hapësirat e QKUK-së, gjatë kohës kur i njëjti po raportonte për plagosjen e një këshilltari të kryetarit të Nismës Socialdemokrate, Fatmir Limaj.
Pas këtij rasti, Inspektorati i Policisë ka kërkuar suspendimin e policëve të cilët nuk kishin ndërhyrë gjatë sulmit të Shalës ndaj gazetarit.
Të premten janë publikuar edhe pamjet nga kamerat e sigurisë ku shihet Shala duke e goditur atë.
Juristja për media, Flutura Kusari, mbrëmë në Interaktiv të KTV-së sulmin ndaj gazetarit e ka cilësuar si sulmin më të rëndë ndaj gazetarisë në vitin 2019.
Edhe
Sulmohet fizikisht gazetari Valon Syla, AGK-ja kërkon hetime urgjente
Ajo tutje ka shtuar se është shumë e rëndësishme të bëhet publik emri i prokurorit të rastit, gjithashtu të tregohet pse nuk janë marrë masa ndaj Shalës.
Kujtojmë se Demokracia Studentore përmes një komunikate ka paralajmëruar protesta nëse Haradinaj nuk e shkarkon nga posti i ministrit në detyrë, Endrit Shala.
