Policia kishte suspenduar hetuesit që përgatitën kallëzimin penal për “rastin Dalladaku”

Dy hetuesit policorë të Krimeve të Rënda janë suspenduar në vitin 2016, disa javë pasi kishin përgatitur kallëzimin penal kundër gjashtë personave për aferën e fajdeve.

Pasi që janë larguar nga ky rast, të dy hetuesit, sipas burimeve të Kohës Ditore, janë suspenduar për disa muaj.

Një gjë të tillë e ka konfirmuar për Kohën Ditore Policia e Kosovës përmes një përgjigjeje me shkrim. Sipas Policisë, suspendimi është bërë për një rast tjetër.

Lexo edhe: Shefat e hetimeve të përfshirë në amnistinë e të dyshuarve për fajde

Rekomandimi për suspendim është bërë rreth dy javë pasi hetuesve u është marrë rasti, ndërsa suspendimin ua ka vërtetuar Komisioni për Ankesa disa muaj pas.

“Suspendimi i dy policëve nuk ka të bëjë fare me rastin në fjalë, por ka të bëjë me një rast tjetër për të cilin është zhvilluar procedurë disiplinore nga Drejtoria e Standardeve Profesionale, ku më datë 9.8.2017, Komisioni i Brendshëm Disiplinor dy policëve të lartcekur u ka shqiptuar masë disiplinore, ndalesë në pagë 20% nga paga mujore bruto për një (1) muaj. Të njëjtën masë Komisioni për Ankesa në PK ka vendosur që të mbetet në fuqi”, thuhet në përgjigjen e Policisë së Kosovës dhënë gazetës.

Lexo edhe: Dy shefat policorë që degraduan hetimin për “rastin Dalladaku” duke e transferuar në Ferizaj

Në një shkresë, të cilën e ka parë gazeta, thuhet që suspendimi i këtyre dy zyrtarëve ka ardhur si pasojë që këta policë kanë ngritur dyshime në lidhje me shefin e tyre, që në këtë rast është Fadil Gashi.