Pesë shtete kërkojnë “kufizime transitore” për vendet e reja anëtare të BE-së

Në Bashkimin Evropian po gjen gjithnjë e më shumë mbështetje ideja për vendosjen e masave të sigurisë ndaj vendeve të ardhshme të reja anëtare në rast se ato shënojnë kthim prapa në respektimin e vlerave dhe standardeve evropiane. 

Disa shtete të BE-së, përmes një letre të përbashkët, kanë kërkuar që këto “siguresa“ të vendosen edhe në Traktatet e anëtarësimit në procesin e zgjerimit. Ato do të përfshinin edhe heqjen e përkohshme të së drejtës së vetos për shtetet e reja anëtare në disa fusha ku kërkohet unanimiteti siç janë politika e jashtme dhe zgjerimi.

Po ashtu kanë kërkuar faza transitore për qasjen në tregun e punës së BE-së dhe në mundësitë e dhënies së shërbimeve.

Në dokumentin e nënshkruar nga Franca, Gjermania, Belgjika, Holanda dhe Luksemburgu, që të pestat themeluese të BE-së, thuhet se situata gjeopolitike ka ndryshuar ndjeshëm që kur në vitin 2013 në BE kishte hyrë Kroacia dhe tash zgjerimi shihet jo vetëm si një proces teknik i bazuar në merita, por si një investim strategjik në paqen, sigurinë, stabilitetin dhe prosperitetin e kontinentit.

Nënshkruesit e kësaj letre kërkojnë po ashtu që edhe shfrytëzimi i mjeteve të BE-së për vendet e reja anëtare të lidhet me respektimin e sundimit të ligjit, lirive të përgjithshme dhe të ketë vegla për të sanksionuar ato vende që do të shkelnin këto parime në të ardhmen.

Edhe në të kaluarën në Traktatet e anëtarësimit me vendet e reja anëtare ka pasur raste kur janë vendosur kufizime për ato vende në një fazë transitore por tash kërkohet që kjo të përdoret në mënyrë më të gjerë.

Edhe Botë 1 muaj më parë Pesë vende të BE-së paraqesin udhëzime për kufizim të vendimarrjes për anëtarët e rinj